Kryeprokurori Llalla është riaktivizuar sërish në kritikat e tij, deri dhe akuzat ndaj politicë, duke qenë jo si për koiçidencë, në një gjatësi vale me LSI-së. Shefi i akuzës shqiptare, me në krah kreun e Drejtësisë, Petrit Vasili, kanë adresuar rezerva ndaj policisë për luftën e saj kundër drogës. Duke e shpallur sërish si një problem madhor kultivimin e saj në masë, Llalla tha se vartësit e tij nuk lejohen në rastet e sekuestrimit të drogës.
“Edhe mënyra e administrimit të provave materiale mbetet shqetësim. Ka mospërfshirje të prokurorëve në mënyrën se si sekuestrohen e asgjësohen lëndët narkotike. Droga e sekuestruar nuk po asgjësohet sipas ligjit”, theksoi ai.
Më pas ishte ministri Vasili ai që tha se “qeveria duhet të jetë e pakursyer për fondet që vë në dispozicion për hetimin e trafikut të lëndëve narkotike. Duhet ashpërsuar politika penale për grupet e strukturuara kriminale që trafikojnë kanabis”.
Prej afro një muaji, qeveria ka shpallur një aksion me përmasa kombëtare për pastrimin e të gjithë territorit shqiptar nga kanabisi. Kjo, nëpërmjet një plani kombëtar të hartuar nga policia e shtetit. Që atëherë, me qindra tonë kanabis janë sekuestruar, krahas zbulimit të disa fabrikave të përpunimit të drogës, njëra prej të cilave në Skrapar, feudin e LSI-së. /tesheshi.com/
