Kreu i PD-së, Basha premtoi se gjatë ditëve në vijim do publikohen të dhëna kompromentuese që sipas tij provojnë përfshirjen e qeverisë në afera droge.
“Dhe ky është vetëm fillimi. Në ditët e ardhshme do ketë të reja të tjera që zbulojnë përfshirjen e qeveritarëve shqiptarë dhe të Ramës në mbështetje të krimit dhe të trafikantëve të drogës”, tha Basha.
Por ndërkohë, edhe më herët Basha është deklaruar mbi posedim dosjesh apa faktesh akuzuese ndaj qeverisë, shoqëruar me premtimin për t’i bërë publike, gjë që nuk ka ndodhur, veç akuzave të zakonshme për “lidhje me krimin dhe drogën”. Kështu që java e ardhshme do jetë dhe një provë për Bashën, në lidhje me seriozitetin e këtij premtimi të bërë këtë fundjavë. Nga ana tjetër, ai përmendi rastin “Zagani”, duke theksuar se ky i fundit u burgos pasi denoncoi lidhjet e Tahirit me Habilajt.
“Punonjësit e shërbimit të kontrollit të Ministrisë që arrestuan Zaganin duhet të hetohen dhe të merren të pandehur për montim akuzash dhe konspiracion në mbështetje të krimit. Këtë duhet të bënte Edi Rama, të çonte këta punonjës në prokurori. Por Edi Rama nuk është më kryeministër. Tani ai është avokati mbrojtës i Tahirit dhe i Habiljave”, tha Basha. /tesheshi.com/
