Rreth 1100 vagona me drithë presin të kalojnë kufirin me Poloninë në Ukrainën perëndimore, por nuk mund të zhvendosen për shkak të procedurave të gjata burokratike dhe problemeve logjistike, paralajmërojnë tregtarët dhe zyrtarët e kompanisë hekurudhore të Ukrainës.
Kur atyre i shtohen vagonët e ngarkuar me vaj vegjetal, mineral hekuri, metale, kimikate dhe qymyr, shifra rritet në 24,190 vagona, sipas të dhënave të publikuara së fundmi të kompanisë shtetërore hekurudhore të Ukrainës – Ukrzaliznitcija.
Përafërsisht gjysma e këtyre vagonëve, 10,320 prej tyre, janë duke pritur në kryqëzimin afër fshatit Izov, vendkalimi kryesor hekurudhor kufitar me Poloninë, në rrugën e tyre për në portin polak të Gdansk, shpjegon Valery Tkachev, zëvendësdrejtor i departamentit tregtar në Ukrzalznitzia.
Eksportuesit më të mëdhenj të drithërave
Problemi kryesor është se nuk ka punëtorë apo vagona të mjaftueshëm që mund të përpunojnë dhe marrin përsipër një sasi kaq të madhe mallrash, thonë njohës të industrisë dhe qeverisë.
Ukraina është një nga eksportuesit më të mëdhenj të drithërave në botë, dhe para luftës i eksportonte ato pothuajse ekskluzivisht përmes Detit të Zi. Hekurudha ishte në plan të dytë, për shkak të kostove më të larta të transportit.
Tani Kievi po kërkon një rrugë alternative, tokësore për eksporte pasi sulmi rus ka bllokuar portet e tij kryesore në jug, duke e bërë të vështirë eksportin e grurit dhe mallrave të tjera, kujtojnë zyrtarët dhe të brendshëm të industrisë. Tregtarët theksojnë se përpjekjet pengohen nga sfidat logjistike, por edhe nga burokracia.
Rrjeti hekurudhor ukrainas përdor binarë rusë rreth 1.5 metra të gjerë, të cilt janë rreth 10 centimetra më të gjera se ato në pjesën më të madhe të Evropës, kështu që vagonët duhet të ngrihen me vinç dhe shasia të ndërrohet me dorë, shpjegon kreu i hekurudhës ukrainase
Një zgjidhje alternative do të ishte shkarkimi i grurit nga vagonët ukrainas në polakë, gjë që mund të zgjasë deri në gjysmë ore për një vagon.
Deri në 500 vagona në ditë aktualisht kalojnë kufirin pranë Izovit, thekson Tkachov, që me fjalë të tjera në fakt do të thotë një dërgesë e akumuluar trejavore. Ka edhe një duzinë vendkalime të tjera, por shumë prej tyre nuk kanë infrastrukturë adekuate, shpjegon ai.
Hekurudha shtetërore po punon për të rritur kapacitetin në mënyrë që 1,100 vagonë me drithë në ditë të mund të transportohen në Poloni, Rumani, Hungari dhe Sllovaki brenda tre muajve, që do të ishte një rritje pothuajse dhjetëfish nga niveli i marsit, tha ai.
Në të njëjtën kohë, kompania po punëson punëtorë të rinj, duke transferuar punëtorët aktualë nga departamenti i transportit të pasagjerëve në departamentin e transportit të mallrave, duke blerë pajisje për rregullimin e vagonëve dhe duke u përpjekur të lehtësojë problemet e tjera, siç janë procedurat doganore, shtoi Tkaçev.
“Ne po punojmë për përshpejtimin e procedurës … duke reduktuar numrin dhe kohëzgjatjen e inspektimeve të vagonëve dhe dokumenteve,” specifikoi ai.
Mbyllja e portit
Prodhuesi ukrainas i ushqimit Astarta Holding pritet të dërgojë 25,000 tonë metrikë misër për klientët në Evropë në prill, por nuk ka marrë ende miratimin e nevojshëm nga rregullatorët e hekurudhave, tha Yulia Bereshchenko, drejtore e marrëdhënieve me investitorët dhe zhvillimit të biznesit.
Kompania tha gjithashtu se ata kanë rreth 150,000 ton drithë të papërdorur në magazinë, kryesisht misër. Në këtë periudhë të vitit kapanonet duhet të jenë pothuajse bosh, theksojnë ata.
Ukraina raportoi se eksportet e grurit në mars ishin një e dhjeta e nivelit nga i njëjti muaj i vitit të kaluar për shkak të mbylljes së porteve, duke shtuar se ndërprerja po prek njerëzit në shumë vende.
Agjencitë e ndihmës humanitare theksojnë se vendet që deri më tani kanë importuar drithë nga Ukraina, përfshirë Kinën, Egjiptin, Turqinë dhe Indonezinë, do të duhet të gjejnë burime alternative të furnizimit sepse në të kundërt do të përballen me mungesë ushqimi. /tesheshi.com/
