Dritëro Agolli vlerëson Albin Kurtin ndër politikanët në Kosovë, del kundër Gjykatës Speciale

Shkrimtari i njohur shqiptar, Dritëro Agolli veçon Albin Kurtin nga politikanët e brezit të ri në Kosovë. Në një intervistë botuar  në gazetën Shekulli në Tiranë, Agolli flet edhe për politikanët e Kosovës ashtu si ai i njeh dhe i ka ndjekur, disa përmes medias, disa nga takimet që ka pasur vetë me ta.

I pyetur për brezin e ri të politikanëve, Agolli shprehet se i ka lënë mbresa Albin Kurti.

“Është një djalë i guximshëm dhe i përgatitur. E kam ndjekur dhe më ka lënë mbresa. Më pëlqen vizioni që shfaq dhe mënyra se si flet. Është i thjeshtë dhe unë jam i mendimit se politikanët duhet të jenë të thjeshtë, të gjithë njerëzit e mëdhenj që kanë lënë gjurmë kanë folur thjesht. Janë argumentet ato që triumfojnë. Dhe kam parë që në çdo debat dhe përballje nuk i mungojnë argumentet”, thotë ai.

Ndërsa për ish-presidentin Rugova, Agolli thotë se kishte kulturë të gjerë, por jo informacion për Kosovën

“Dinte të dëgjonte dhe kjo ishte një armë e fortë e tij. Disa herë që e kam takuar kemi diskutuar, përveç letërsisë, edhe për situatën në Kosovë. Më ka treguar shumë gjëra për Kosovën e asaj kohe. Nuk kishte shumë informacion se çfarë po ndodhte në Kosovë dhe pse unë vazhdimisht kam pasur takime me shkrimtarë të Kosovës dhe më njoftonin”, shprehet shkrimtari.

Mes të tjerash, Agolli shprehet i shqetësuar nga lajmet që i vijnë prej Kosovës se ata që luftuan, nuk kanë vepruar siç duhet në politikë. “Në atë kohë më pëlqente entuziazmi i tyre, por sot në politikë kur dëgjoj se disa prej tyre kanë bërë dhe gabime nuk më vjen mirë. Nuk duhet të kishin shkelur mbi idealet e dikurshme. Rasti i Gjykatës Speciale është një nga gabimet e fundit. Nuk duhej ta mbështesnin këtë Gjykatë, ata që bënë luftë të pastër për lirinë e popullit. Shqiptarët nuk kanë bërë asnjëherë krime ndaj popujve të tjerë”, thotë Dritëro Agolli.