I sapozgjedhuri në krye të SPAK-ut, Prokurorisë së Posaçme dalë nga Reforma në Drejtësi, e cila pritet t’u hedhë prangat të paprekshmëve në 30 vite, nga maja shtetërore e politika, tha se koha e llafeve mbarroi.
“Koha është për punë, jo për llafe”, tha Arben Kraja, njeriu që do drejtojë strukturën që aludohet se pështjelloi të gjithë politikën, për shkak të kërcënimit mbi të.
Ai, së bashku me kolegë të tjerë dhe kreun e KLP-së Gent Ibrahimi, aty prej nga u formua SPAK, premtoi se do jepte rezultate konkrete, duke punuar në grup dhe me kolegët, përfshirë ata të dy me të cilët konkuroi për të drejtuar këtë instancë.
“Bashkë me Dumanin dhe Kondilin do të bëjmë një skuadër të fortë. Koha është për punë, jo për llafe. Kemi shumë punë për të bërë”, theksoi Kraja, një prokuror karriere nga Shkodra, fillimet e të cilit në drejtësi janë para 90-ës, por që rezultoi i pastër nga vettingu.
E megjithatë, zgjedhja e Krajës ngre hije dyshimi për një emërim konsiprativ. Sepse më i kuotuari ishte Altin Dumani. Edhe në paraqitjen para KLP-së gjatë kandidimit, Dumani ishte më bindës, më konkret, dhe kauzal në luftimin e krimit e korrupsionit në nivelet më të larta. Pos kësaj, rezultoi me rekord ndershmërie nga vettingu. /tesheshi.com/
