Gjykata e Apelit në Kosovë ka sjellë aktgjykimin e saj për rastin “Drenica I”, ku të gjithë ish-komandantët dhe ish-ushtarët e UÇK-së të Zonës Operative të Drenicës i shpallë fajtorë.
Ndaj këtij vendimi ka reaguar Tomë Gashi, avokati i Sylejman Selimit, i cili ka thënë se ky aktgjykim është katastrofal, për çka ka paralajmëruar dërgimin e rastit në Gjykatën Supreme.
“Sa i përket Gjeneral z.Sylejman Selimi dënimi është përcaktuar në 5 vite e 3 muaj burgim, ashtu që duke pasur parasysh edhe rastin “Drenica II” i është bashkuar dënimi dhe i është shqiptuar dënim unik në kohëzgjatje prej 10 viteve.
Sa i përketë Gjeneralit z.Sami Lushtaku ai është liruar nga vepra penale për vrasje dhe dënimi është ndryshuar dhe i është shqiptuar dënim me burgim prej 7 viteve dhe poashtu z.Jahir Demakut i është bashkuar dënimi në rastin “Drenica I” dhe “Drenica II” dhe i është shqiptuar dënim burgimi në kohëzgjatje prej 7 viteve.
Ne avokatëve na mbetet që edhe këtë rast ta dërgojmë në Gjykatën Supreme të Kosovës, duke shpresuar se nuk do të ketë Gjyqtarë të tillë të EULEX-it, të cilët me paragjykime shqiptojnë dënime vetëm për shkak se Gjeneral z.Sylejman Selimi, z.Sami Lushtaku, Jahir Demaku dhe të tjerët kanë luftuar për lirin tonë”, thuhet në reagimin e avokatit Gashi.
Kësisoj, ky vendim i organeve të drejtësisë e çon edhe qytetin e Skënderajt në zgjedhje të parakohshme. /tesheshi.com/
