Nga Blendi Gashi
Drenasi ka nxjerrë më së miri në pah përçarjet dhe inatet e mëdha që ekzistojnë mes drejtuesve të PDK-së dhe atyre të NISMA-s, përkatësisht Kadri Veselit dhe Fatmir Limajt. Që gjatë luftës dhe gati dhjetë vjet më pas, ata ishin miq të pandashëm, duke festuar madje dhe fitoret e zgjedhjeve ndaj kundërshtarit më të madh politik, pra LDK-së.
Por tashmë gjërat kanë ndryshuar rrënjësisht dhe ish-luftëtarët e UÇK-së kanë nxjerrë alltitë dhe po luftojnë, jo ndaj serbit por ndaj njëri-tjetrit, pra, për pushtet, për çka nuk e kanë problem fare të hedhin akuza të llojllojshme mes vete.
Dhe gëzimi i madh për triumfin në Drenas jo vetëm i Ramiz Lladrovcit që do udhëheq në dhjetë muajt e ardhshëm këtë komunë, por edhe figurave të larta të PDK-së, a thua se fituan Prishtinën e jo një komunë që e udhëhoqën nga paslufta, tregon qartë për një armiqësi të madhe të krijuar mes ish-bashkëpartiakëve.
Ashtu edhe siç pritej, PDK pasi konfirmoi se mbetet e pathyeshme në Drenicë, nisi “goditjet” ndaj NISMA-s për Kosovën, konkretisht kreut të saj Fatmir Limaj.
Dhe, është pikërisht i pari i Drenasit që ngacmoi rivalët duke thënë se NISMA nuk ekziston më në këtë qytet.
“E ftoj (Isa Xhemajlajn) që të kthehet në partinë e vet, Nisma nuk ekziston më. PDK në Drenas është në festë”, u shpreh Lladrovci.
Pas fitores s’kishte si të mos deklarohej edhe kreu i PDK-së, Kadri Veseli. Ndonëse nuk ka përmendur me emër NISMA-n, në mesazhin e tij përveç urimit për qytetarët, nuk ka lënë pa ironizuar me rivalët.
“Qytetarët, me vullnetin e tyre të lirë dhe në një proces të shembullort zgjedhor, treguan se Drenica dhe PDK janë një lidhje e pashkëputshme. Falemnderit nga zemra. Ramizit, punë të mbarë si Kryetar i ri i Drenasit. Festë është për të gjithë”, ka shkruar Veseli, në Facebook.
Pra, siç mund të shihet Veseli në mënyrë indirekte i drejtohet Krasaniqit e Limajt, se kot e kanë pasi nuk mund ta fitojnë Drenicën.
Më i drejtpërdrejt është Gani Koci, zv.ministri i Zhvillimit Ekonomik, i cili ka goditur Limajn.
“Në krejt këtë meselen e Drenasit, po më dhimbset veç Fatmir Limaj! Nuk do ketë mundësi me ndërtu mbikalimin dhe nënkalimin në Komaran! Urime Drenas!”, ka shkruar ai në Facebook.
Edhe deputetja Ganimete Musliu, përmes një postimi të bërë ka ironizuar me partinë e ish-kolegët e saj.
“Qytetarët e Drenasit edhe njëherë ju treguan se çdo herë që bëheni bashkë kundër nesh do t’na gjeni në të njëjtat pozicione! Faleminderit qytetar të Drenasit që dhat shembullin më të mirë të qytetarisë! Urime fitoren e merituar! Ju jeni #Forca #Fuqia #Shpirti i #PDK-së”, ka shkruar Musliu.
Limaj i kundërpërgjigjet ish-bashkëpartiakëve: Humbëm betejën por jo luftën
Nuk ka vonuar shumë dhe Limaj i është kundërpërgjigj ish-patisë së tij duke thënë se qytetarët që dëshiruan ndryshimin u përballën me aparatin shtetërorë, duke thënë se Drenasi më nuk është bastion i asnjë subjekti.
Ndërsa, ka paralajmëruar ish-bashkëpartiakët se betejën e humbi por jo edhe luftën, dhe se vitin e ardhshëm do të kenë përkrahje më të madhe nga qytetarët dhe do të triumfojnë.
“Ne me Isa Xhemajlin do të vazhdojmë për ta ndryshuar qeverinë pas disa muajve edhe më të vendosur, edhe më të përgatitur deri në fitore. Kjo punë e juaja ishte një hap i madh drejt qëllimit tonë”, ka shkruar Limaj. /tesheshi.com/
