Tre kryeredaktorë kanë dhënë dorëheqjen në një prej pak grupeve mediatike të pavarura në Rusi. Elizaveta Osetinskaya, kryeredaktore e grupit mediatik RBC, Roman Badanin, kryeredaktor i agjencisë së lajmeve të grupit, dhe Maxim Solyus, kryeredaktor i së përditshmes së këtij grupi mediatik, nuk do mund t’i ushtrojnë më funksionet e tyre, duke u dorëzuar para presionit të Kremlinit.
Një artikull të mërkurën e kaluar në të përditshmen e grupit mediatik ishte më i fundit raportim mbi interesat e biznesit të familjes së presidentit Putin.
Marrëveshjet financiare të njerëzve pranë presidentit rus, midis të cilëve dhe dhëndri i tij, kanë qenë në vëmendjen e gazetarëve investigativë të këtij organi mediatik.
Nga çfarë raportohet, Kremlini i ka dërguar në mënyrë të përsëritur sinjale pronarit të grupit mediatik se disa tituj ishin të papëlqyeshëm për të. Presioni disajavor përfshin dhe kontrollin policor në disa ambiente të organit informativ.
Zëdhënësi i Kremlinit, Dmitry Peskov, ka mohur të ketë patur e të ketë ketë presion mbi grupin mediatik.
RBC është pronë e Onexim-it, një grup i kontrolluar nga miliarderi Mikhail Prokhorov. Onexim ka kërkuar të pushojë nga puna kryeredaktorin e gazetës, por tre drejtuesit redaksionalë kanë vendosur të dorëhiqen së bashku. /tesheshi.com/
