Serdar Çam, kreu i Agjencisë Turke për Bashkëpunim dhe Koordinim, apo, siç njihet ndryshe, i TİKA-s, ka folur për agjencinë e lajmeve Anadolu Agency, duke shprehur bindjen në vazhdimësinë e prosperitetit të Turqisë, për të mos u ngjarë vendeve të tjera të rajonit.
Turqia nuk do të kthehet në një tjetër Egjipt, Irak apo Siri, është shprehur Serdar Çam, sepse presidenti i saj, partitë opozitare dhe parlamenti janë tani plotësisht të bashkuar.
Ai është besimplotë se me atë çka po ngjet së fundi, për Turqinë do të nisë një epokë e re.
“Një kohë ishte ASALA (grupi terrorist armen), pastaj erdhi PKK-ja, DAESH-i, e tani FETÖ-ja. Këto lojëra tinëzare do të vazhdojnë për sa kohë që vazhdon suksesi i paqortueshëm i Turqisë. Spastrimi radikal (i elementëve të FETÖ-s) do të hapë një epokë të re në Turqi.”
Në komentin e tij, njeriu që drejton TİKA-n e çmoi lart trimërinë e popullit turk gjatë puçit të dështuar.
Duke iu referuar mbulimit të pasaktë e të shtrembëruar të ngjarjeve të fundit në Turqi nga media perëndimore, Çam ka thënë se nuk ishte aspak i habitur, sepse ajo kishte patur po ashtu një qasje hipokrite gjatë debatit për Gezi Park-un dhe hetimit për korrupsion të dhjetorit të 2013-tës.
“Eshtë e qartë se disa media perëndimore nuk do të raportojnë në favor të Turqisë, sado hollësi të japim për shpjegim.”
Nën kujdesin e kryeministrisë së Turqisë, Agjencia Turke për Bashkëpunim dhe Koordinim jep një ndihmë të gjerë në shumë vende në zhvillim. /tesheshi.com/
