Vetëm dy muaj ka zgjatur detyra e shefit të fushatës së kandidatit republikan në zgjedhjet presidenciale në SHBA. Paul Manafort ka dhënë dorëheqjen, gjë të cilën e ka pohuar dhe Donald Trump nëpërmjet një deklarate.
Manafort ka qenë së fundi në qendër të kritikave për lidhjet e tij me interesat ruse dhe me ish-presidentin ukrainas Viktor Yanukovych.
Por, siç njofton BBC-ja, nuk është ende e qartë pse ai e la detyrën.
Paul Manafort, një njeri me shumë përvojë politike, e mori në dorë fushatën e Trump-it në qershor, pas largimit të Corey Lewandowski-t.
Trump do ta çmonte Manafort-in si një profesionist të vërtetë, duke e falënderuar për punën e madhe, veçanërisht gjatë përgatitjes dhe zhvillimit të konventës së republikanëve. /tesheshi.com/
