Një ngjarje aspak normale është regjistruar sot në kryeqytet, në një nga zonat më të populluara, ku një drejtues automjeti ka mbyllur në kazanin e mbeturinave një fëmijë rom, të moshës 10 vjeç.
I mituri po kërkonte lëmoshë kur është përballur me dhunën e drejtuesit të mjetit. Kalimtarë të rastit kanë njoftuar policinë në lidhje me ngjarjen, ndërsa ishin efektivë të policisë bashkiake që kanë ndihmuar të miturin të dalë nga kazani dhe e kanë dërguar pranë komisariatit nr 2. Për shkak edhe të gjendjes së rënduar psikologjike, policisë i është dashur të kontaktojë me një psikologe, ndërsa kanë nisur hetimet për identifikimin e shoferit të dhunshëm.
Veprimi ndaj të miturit ka ndodhur në rrugën “Myslym Shyri”, e cila ndodhet disa metra larg Drejtorisë së Policisë së Tiranës.
E gjithë kjo zonë monitorohet nga kamerat e sigurisë, çka do të thotë se policia nuk do e ketë shumë të vështirë për të identifikuar drejtuesin e mjetit. /tesheshi.com/
