Një gjykatë në Egjipt ka kërkuar që ligji për dënimin me vdekje të ndryshohet për të lejuar që ekzekutimi i një vrasësi të transmetohet drejtpërdrejt në televizion.
Sipas Daily Mail, 21-vjeçari Mohamed Adel u shpall fajtor dhe u dënua me vdekje për vrasjen e një kolegeje studentore në Universitetin Mansoura, pasi ajo refuzoi propozimin e tij për martesë.
Gjykata më pas i shkroi parlamentit egjiptian, duke kërkuar që varja të transmetohej në televizion për të parandaluar krime të ngjashme të tmerrshme në të ardhmen.
“Televizioni qoftë edhe i një pjese të procedurës mund të arrinte qëllimin e parandalimit, gjë që nuk u arrit me transmetimin e shpalljes së dënimit”, thuhet në shkresën e gjykatës.
Vrasja tronditëse e të resë Naira Ashraf më 20 qershor jashtë universitetit që ajo ndoqi u kap në video. Adeli e sulmoi me inat të pabesueshëm të renë, duke e goditur me thikë disa herë në qafë dhe gjoks, duke bërë që ajo të ndërrojë jetë në vend. Më pas kalimtarët e rastit e ndaluan vrasësin ndërsa ai qëndronte sipër saj me thikë.
Siç u zbulua në gjykatë, 21-vjeçari ka përndjekur studenten e re, pas së cilës ishte e fiksuar dhe vendosi ta vriste kur ajo refuzoi propozimin e tij për martesë.
Avokatët e vrasësit kanë rreth 60 ditë kohë për të kërkuar prishjen e ekzekutimit, por gjykata po kërkon brenda kësaj kohe ndryshimin e ligjit në mënyrë që Adele të mund të varet drejtpërdrejt në televizion.
Kujtohet se ekzekutimi i fundit televiziv në Egjipt ishte në vitin 1998, kur tre burra u ekzekutuan për vrasjen e një gruaje dhe dy fëmijëve të saj në shtëpinë e tyre në Kajro. /tesheshi.com/
