Mensur Krasniqi
Si duket po i bën mirë presioni ndërkombëtar gjyqësisë në Maqedoni. Pas vërejtjeve të shumta në adresë të sistemit gjyqësor maqedonas dhe ndikimit të saj ndaj autoriteteve qeveritare, së fundmi po shihet pak dritë në fund të tunelit.
Kështu sot Gjykata Themelore e Shtipit ka shpallur fajtor biznismenin Miki Naumov i cili para disa muajve me tendencë kishte pohuar se kryetari i Komunës së Strumicës dhe kryetari i LSDM-së, Zoran Zaev, i ka kërkuar mito. Andaj Naumov me aktgjykim të gjykatës obligohet që të paguajë dëmshpërblim prej 150 mijë denarëve liderit opozitar në Maqedoni.
Naumov, kundër të cilit Zoran Zaev ka paraqitur akuzë, është shpallur për fajtor, sepse sipas Gjykatës, me shpifje e ka dëmtuar imazhin dhe nderin e kryetarit të LSDM-së.
Biznesmeni nga Shtipi Miki Naumov para disa muajve, në një deklaratë për disa mediume pro qeveritare, e ka akuzuar kryetarin e Strumicës se i ka kërkuar 39.000 euro që t’i jepet vend atraktiv në “Global”. E gjithë kjo flitej se ka qenë një situatë e montuar nga pushteti si kërcënim për Zaevin që të ndalon me publikimin e “bombave” lidhur me përgjimet e krerëve të VMRO-së.
Andaj Zaev në lidhje me rastin në fjalë ka thënë: “Kjo është shpresë se ka të ardhme në gjyqësorin tonë. Më vjen mirë që ka pasur gjykim të shpejtë”.
Përveç tjerash kryetari i LSDM-së, Zoran Zaev, sot i është përgjigjur edhe pyetjes se a janë të vërteta akuzat që sipas VMRO-DPMNE-së, LSDM-ja i ka bllokuar bisedimet me qëllim që të vazhdojë t’i publikojë “bombat”. Ai ka thënë se nëse LSDM-ja, do të kishte dashur të vazhdojë me publikimin e bombave s’do të u ulej fare në tavolinën biseduese me VMRO-DPMNE-në.
Ndërsa në lidhje me spekulimet rreth emrave të ministrave të mundshëm të qeverisë së re kalimtare, Zaev ka thënë se nuk ka asgjë të vërtetë rreth tyre. /tesheshi.com/
