Një gjykatë në Mbretërinë e Bashkuar ka vendosur që Julian Assange, themeluesi i WikiLeaks, nuk do të ekstradohet në SHBA.
Gjykatësja Vanessa Baraitser hodhi poshtë pothuajse të gjitha argumentet e mbrojtjes në lidhje me aktakuzën e motivuar politikisht, por tha se ajo nuk mund të lejonte ekstradimin e Assange në SHBA sepse ekziston një rrezik i lartë që ai të bëjë vetëvrasje.
Avokatët e të akuzuarit australian e mbrojtën Assange me argumente se ai u soll si gazetar dhe iu referua Amendamentit të Parë, i cili thekson posaçërisht lirinë e fjalës për të botuar dokumente që ekspozonin veprimet e paligjshme të ushtrisë amerikane në Irak dhe Afganistan.
Shtetet e Bashkuara akuzojnë Assange për spiunazh, pasi publikoi qindra mijëra dokumente sekrete në internet.
Shtetet e Bashkuara kanë ngritur 18 akuza kundër 49-vjeçarit Assange, për botimin e rreth 500,000 dokumenteve të klasifikuar në 2010.
Këto janë dokumente konfidenciale, me detaje të operacioneve ushtarake amerikane në Afganistan dhe Irak.
Vendimi për ekstradimin merret pas më shumë se dhjetë vjet ngatërresash dhe polemikash juridike ndërkombëtare që ndjekin rastin e këtij australiani.
Vendimi i sotëm nga një gjykatë britanike është objekt ankimi, që do të thotë se saga ligjore mund të vazhdojë.
Qeveria e SHBA ka thënë se do të apelojë vendimin.
Në rast të një dënimi amerikan, Assange do të përballej me 175 vjet burg. /tesheshi.com/
