Aktivistë të Vetëvendosje-s, në përfundim të marshit protestues në 1-vjetorin e vdekjes së Astrit Deharit, kanë gjuajtur me ngjyrë të kuqe objektin e qeverisë. Me këtë rast janë thyer dhe disa xhama. Para kësaj vetëvendosësit janë afruar te hyrja e ndërtesës së qeverisë dhe kanë vendosur një mbishkrim ku i jepet “ultimatum” qeverisë dhe institucioneve të tjera që deri më 5 shkurt 2018 të zbardhet vdekja e Astrit Deharit.
Për afatin e dhënë ka folur deputeti Albin Kurti i cili para protestuesve ka kërkuar edhe shkarkimin e zyrtarëve që sipas tij ishin përgjegjës e të cilët do ta pengonin një hetimin siç janë Dhurata Hoxha, Shpend Maxhuni, Nexhmi Krasniqi, Fatos Makolli, Sylë Hoxha, Metush Biraj dhe Abdurrahim Islami.
Kurti, para protestuesve tha se rënia dëshmor e Astritit dëshmon se “po sundohemi nga një kastë e dhunshme kriminelesh që e kanë uzurpuar lirinë, të cilët vjedhin dhe shesin pasurinë tonë”.
“Ata e kanë braktisur kombin për t’u bërë mafiozë milionerë, ata e kanë kapur policinë, hetuesinë, prokurorinë dhe gjykatën, ata po e shfrytëzojnë popullin tonë dhe ata janë të gjithë fajtorë për mbytjen e Astritit në burg”, tha Kurti.
Kurti tha se u bën një vit që duken sa një shekull, pa Astritin si një aktivist e patriot, i cili punoi gjithnjë për drejtësi e barazi.
“Ne patëm nevojë të kishim pranë Astritin, shokun tonë të dashur, patëm nevojë për studentin që nesër do të bëhej mjek që aq shumë ka nevojë Kosova. Astritin nuk na mori sëmundja apo aksidenti, Astritin na mori padrejtësia të cilën ai e luftonte me gjithë qenien e tij si çdo aktivist i njëmend që nuk i ndjek idetë në mënyrë abstrakte por që i mishëron ato dhe i lufton ato ditë e natë dhe kudo. Një vit më parë Astriti është bërë dëshmori më i ri i Kosovës dhe i shqiptarisë. Ndonjë cinik mund të pyet e çfarë nevoje patëm për një dëshmor ne shqiptarët, e pyetja qëndron njëmend pas luftës çlirimtare përse ka nevojë të ketë montime akuzash politike, burgosje, vrasje në burgje”, tha ai.
Haradinaj: Do realizohen kërkesat e familjes Dehari
Kryeministri Haradinaj, përmes një shkrimi në Facebook, ka thënë se bashkëndjenë me familjarët e të ndjerit Astrit Dehari, miqtë e madje edhe me qytetarët të cilët protestuan për ndriçimin e rastit të vdekjes së tij.
Ai është zotuar se qeveria e tij do të bëjë gjithçka që ky rast të ndriçohet, ndërsa ka premtuar se kërkesat e familjes së Deharit do të realizohen.
Kujtojmë se protestuesit fillimisht u mblodhën para Bibliotekës Kombëtare e më pas marshuan nëpër shesh me pankarta në duar “Drejtësi për Astritin”. /tesheshi.com/
