Ajo është një dramë e dyfishtë: ekononike, por dhe e ardhur nga drejtësia e pashpirt e këtij vendi. Top Channel ka shpalosur rastin e rrallë të një gruaje, nënë e tre fëmijëve të vegjël, e cila është dënuar me 8 vite burg për vjedhje, e ku për këtë arsye, pas hekurave ndodhet dhe më i vogli i saj 11-muajsh. Xhuliana Çami ka rrëfyer se kohë më parë, nga hallet ekonomike, e papunë bashkë më të shoqin dhe me fëmijë të vegjël për t’u ushqyer, është detyruar që të vjedh, në një formë të rrallë, ku pasi merrte shtëpi me qera, hiqej si qeradhënëse; dhe, pasi fuste qeranë e parë në xhep nga qeramarrësi, zhdukej më pas për ta vijuar këtë rit. Dëmi që ajo u ka shkaktuar qytetarëve të rënë peng e mashtrimeve të saj shkon në 160 mijë lekë. Por ajo tha se gjithçka e kishte bërë prej halli, për bukën e fëmijëve:
“Kur kam kryer veprën isha shtatëzënë me djalin, kisha dhe gocën 1 vjeçe, burri pa punë, unë pa punë sepse shtatëzënë s’më merrte njeri dhe u detyrova. Bëra një gabim për hatër të fëmijëve. S’është zgjidhje e duhur por s’kisha ç’të bëja tjetër, që të mos lija fëmijët pa ngrënë”, u shpreh e përlotur Xhuliana.
Ndërsa dy fëmijet e tjerë që burri – edhe ai invalid – ia sillte në burg për t’i takuar, e dinin që e ëma ishte në spital, pra duke e kujtuar burgun për të tillë.
Dhe drama vijon, tashmë nga drejtësia, pasi ajo e ka dënuar plot 8 vjet, pa marrë në konsideratë asnjë kontekst social të saj. Dhe bashkë me të, edhe foshnjën që ende nuk i ka mbushur 1 vjeç e që frymon me të ëmën pas hekurave. Drejtësi pra që “nuk e ka vënë dorën në zemër”, afërmendsh për shkak të xhepave dhe duarve bosh të Xhulianës. /tesheshi.com/
