Nga Entela Canaj
Të bësh piknik nuk është më demode, por një trend i rikthyer në masë kohët e fundit. Sidomos në Tiranë pikniku po preferohet gjithnjë e më shumë si mënyra më argëtuese dhe më pak e kushtueshme për të kaluar një fundjavë me familjen apo me shoqërinë. Sapo hyn pranvera kur koha nis të ngrohet dhe plazhi ende nuk ka filluar mire, në Tiranë njerëzit organizohen për piknik. Dajti dhe Peza janë dy destinacionet më të preferuara për shëtitje në natyrë.
Organizimi për piknik
Grupe familjarësh apo shoqërore me 5-6 veta, me ushqime dhe zgarë me vete rehatohen në lëndinat e gjelberuara të Pezës, nën hijen e pemëve, ndërsa i gëzohen ajrit të pastër larg Tiranës së zhurmshme, duke shijuar natyrën e gjelbër dhe gjithë panoramën që të ofron periferia e Tiranës.
Duket se është bukur për të gjithë: të rriturit bisedojnë lirshëm, të rinjtë bëjnë zgarë, të vegjlit luajnë pa pushim duke vrapuar njëri-pas tjetrit në hapësirën pa limit të parkut të Pezës.
“Nuk para organizoheshim për piknik më parë, por vendosëm ta provonim një herë, dhe na pëlqeu. U bëmë një grup miqsh me 8 veta, morëm makinat, blemë ushqime për zgarë dhe erdhëm në Pezë. Kishim dëgjuar që është bukur, dhe po na pëlqen vërtet. Kemi marrë zgarën e shumë produkte të ndryshme, dhe po shijojmë ushqimin në natyrë. Them se do vijmë prapë, plazhi është ende ftohtë për të shkuar, kështu që pikniku është mirë,” thotë Dorina, e cila ka ardhur në Pezë me të fejuarin dhe shoqërinë e tyre.
Më pak kosto
Përveç natyrës, dhe ndjesisë së të qënit bashkë si familje, pikniku ka edhe më pak kosto se sa të ulesh për një drekë apo darkë jashtë në restorant. “Është shumë më mirë të bësh piknik se sa të shkosh në një lokal dhe të shpenzosh pa fund. Nëse një drekë modeste për 4 persona do të shkonte 5 mijë lekë, pikniku është dyfish më lirë, dhe të kënaq më shumë. E çfarë ka më shumë restoranti; asgjë. Këto muajt e fundit, ne si familje kemi ardhur çdo fundjavë në Pezë, bashkë me dy fëmjët dhe prindërit tanë dhe jemi kënaqur. Familja është bashkë, bisedojmë, qeshim, dhe fëmijët kënaqen duke luajtur. Ku ka më bukur,” tha Rovena nga Tirana.
Të bën përshtypje që edhe pastërtia nuk mungon në Pezë. Qytetarët janë ndërgjegjësuar se vendi duhet mbajtur pastër. Pasi mbarojnë drekën dhe fikin zgarën, mbetjet mblidhen dhe hidhen në koshat që i ka vendosur komuna aty përreth, dhe gjithçka është gati për fundjavën tjetër…
Dasmat
Por në Pezë organizohen edhe shumë dasma, madje edhe dasma VIP. Çiftet e parapëlqejnë shumë sheshin e madh në Pezë, ku ka mjaft hapsirë për të bërë ceremoninë e altarit në natyrë. Këtu është martuar edhe një nga ministrat shqiptarë.
Fshati piktoresk
Peza është një fshat piktoresk, plot gjelbërim dhe histori. Në sheshin e madh që ka përmasat e një parku gjigand ndodhet edhe shtëpia e vjetër e Myslim Pezës, patriotit shqiptar që ishte një ndër organizatorët e të famshmes Konferencë të Pezës.
Lapidari që dëshmon për konferencën e mbajtur në vitin 1942 ndodhet aty; me shkronja të gdhendura që rrëfejnë në pak rreshta historinë. Ndërsa shtëpia e vjetër e Myslim Pezes i jep këtij fshati një rëndësi historike dhe turistike njëkohësisht, pasi kushdo që vjen për herë të parë, i viziton me radhë lapidarët dhe monumentet historike duke bërë edhe foto si kujtim.
Banorët
Ky fshat është një mrekulli e natyrës, tashmë edhe me rrugën e re asgjë nuk të kushton ta vizitosh. Banorët e Pezës shquhen për traditat dhe vlerat e karakterit të tyre: njerëz shumë bujarë dhe mikpritës. Shumica e tyre merren me bujqësi e me ferma pasi nuk kanë mundësi të tjera punësimi. Madje edhe për produktet e tyre kanë vështirësi për t`i shitur pasi nuk gjejnë treg. Nuk e kanë ndjerë dorën e shtetit për subvencione apo kredi bujqësore, gjithçka që kanë mbjellë, pemë frutore, sera, vreshta e etj., e kanë ngritur vetë.
Por Peza nuk është e vetmja zonë e Tiranës ku mund të kalosh fundjavën, për shëtitje apo piknik, Dajti po ashtu, Kalaja e Prezës, Farka, Petrela, apo Parku i Liqenit Artificial, mbledhin çdo fundjavë dhjetra njerëz të cilët shijojnë natyrën dhe kohën e bukur që të fal pranvera. /tesheshi.com/
