Fund drithërues ka qenë ai i takimit mes Lestër Sitit dhe Uest Hemit.
Dy 11-metërsha të dhënë në minutat e fundit, nga një për çdo skuadër, dhe një barazim i arritur veç në çastet finale për vendasit.
Një pikë e fituar apo dy pikë të humbura për Lestër Sitin. Askush nuk di ta thotë me siguri këtë gjer mbrëmjen e së hënës, kur Stouk Siti të ndeshet me Totenhemin.
Tetë ka vajtur diferenca mes dy skuadrave që kryesojnë kampionatin anglez, Lestër Sitit dhe Totenhemit, kur kanë mbetur dhe katër javë gjer në mbyllje të tij.
Vardy e ka kaluar Lestërin që në minutën e 18-të në epërsi ndaj Uest Hemit, ndërsa vendasit kanë qenë me fat minuta më parë, kur shpëtuan prej një topi të përplasur në dy shtyllat e portës.
Loja ndryshoi krejt për miqtë në pjesën e dytë, me futjen në lojë të Andy Carroll-it. Pos kësaj, Vardy, sulmuesi i Lestërit, del në të 56-tën minutë jashtë me të kuqe. Dhe në minutën e 84-t është pikërisht Carroll që barazon shifrat në 1-1, pasi shënon nga pika e bardhë e 11-metërshit. Dy minuta më pas Uest Hemi kalon në avantazh pas një goli të shkëlqyer të Cresswell-it.
Përpjekjet e Lestërit janë të ngathëta në kërkim të barazimit, pa qartësinë e duhur. Gjyqtari nuk jep një 11-metërsh për Lestërin me fillimin e minutave shtesë, në një pozicion krejt të ngjashëm me atë të penalltisë të akorduar për udhëtuesit. Por e ndreq gabimin po me një 11-metërsh krejt të dyshimtë, të akorduar për një ndërhyrje të gabuar të Carroll-it.
Ulloa ruan gjakftohtësinë dhe shënon në minutën e 95-të: 2-2! Stadiumi shpërthen në duartrokitje. Njerëz që qanin para ca sekondash, tani buzëqeshin. Për ta tingëllon shumë më mirë barazimi sesa humbja.
Në fitoftë Totenhemi të hënën, diferenca me Lestërin shkon në pesë pikë, në të kundërt, Lestëri i afrohet më shumë titullit. /tesheshi.com/
