Një fluturim i kompanisë amerikane United u devijua pasi një pasagjer vdiq gjatë fluturimit.
Fluturimi 591 i United u devijua për në New Orleans të hënën pasi një pasagjer mashkull u sëmur. Paramedikët e transportuan burrin në një spital lokal ku u shpall i vdekur.
Sipas zyrtarëve të kompanisë, gruaja e pasagjerit i tha një tekniku mjekësor të urgjencës se burri i saj kishte simptoma të lidhura me COVID.
Zyrtarët nuk konfirmuan nëse pasagjeri ishte pozitiv për koronavirus.
Cameron Roberts ishte pasagjere në fluturim. Për ABC, ajo përshkroi një skenë kaotike në të cilën bashkudhëtarët nxituan të ndihmonin burrin në nevojë.
“Ai ishte shtrirë në mes të korridorit”, tha Roberts. “Ata ende po i jepnin CPR ndërsa u ulëm”.
Roberts dhe i fejuari i saj thanë se udhëtarët bënë kompresime në gjoksin dhe gojën e burrit, duke besuar se ai kishtë pësuar arrest kardiak.
Roberts tha se ajo aktualisht është në karantinë dhe po pret rezultatet e testit COVID.
“Eshtë e trishtueshme të shohësh që, e dini, ata humbën një anëtar të familjes,” tha Roberts, “por në të njëjtën kohë ishte e papërgjegjshme nga ana e tyre të hipnin në aeroplan”.
United tha se ata ishin në kontakt me Qendrat për Kontrollin dhe Parandalimin e Sëmundjeve (CDC) dhe “po ndanin informacionin e kërkuar me agjencinë në mënyrë që të mund të punonin me zyrtarë lokalë të shëndetit për të gjetur këdo që CDC beson se mund të rrezikohet nga infeksioni”.
United kërkon që të gjithë pasagjerët e saj të plotësojnë një formular “Gati për të fluturuar” para se të bëjnë check-in, i cili u kërkon atyre të deklarojnë se nuk janë testuar pozitivisht për COVID-19 ose kanë pasur simptoma në dy javët e fundit.
“Ne u kërkojmë pasagjerëve të mos udhëtojnë nëse ata janë diagnostikuar me COVID-19 ose kanë simptoma të lidhura me COVID. Nëse keni dyshime, opsioni më i mirë është testimi,” tha United. /tesheshi.com/
