Turizmi malor në alpet shqiptare prodhoi një tjetër viktimë, siç ka ndodhur në vite me të rinj aventurierë që tentojnë majat e ashpra të veriut në Shqipëri.
Më konkretisht, një turiste kroate ka humbur jetën në vendin e quajtur “Maja e Jezercës”, Tropojë, pasi ka rrëshkitur nga një lartësi.
Sipas policisë, shtetasja Z. L., 43 vjeçe, për shkak të terrenit të thepisur malor, ka rrëshkitur nga një lartësi dhe për pasojë ka humbur jetën.
Salla Operative e Komisariatit të Policisë Tropojë ka marrë njoftim nga një grup aplinistësh, shtetas kroatë,
të cilët janë ngjitur nga territori i Malit të Zi, për të mbërritur në vendin e quajtur “Maja e Jezerces”, se njëra nga anëtaret e grupit kishte rënë nga një terren i thepisur malor dhe me borë.
Menjëherë pas marrjes së njoftimit, shërbimet e Komisariatit të Policisë Tropojë, së bashku me ekipin mjekësor të spitalit të Tropojës dhe ekipin e kërkim-shpëtimit, janë nisur bashkë me helikopterin e Emergjencave Civile, drejt adresës së dhënë.
Pas disa orësh kërkime nga shërbimet e Policisë, turistët u lokalizuan në vendin e quajtur “Maja e Jezercës”.
Nga ekipi i kërkim-shpëtimit është bërë e mundur nxjerrja e trupit të pajetë që është transportuar me helikopter drejt morgut.
Më pas ka vijuar operacioni i shpëtimit, mbështetur nga Ministria e Shëndetësisë dhe Mbrojtjes, për të bërë të mundur nxjerrjen e turistëve të tjerë nga vendi ku ishin bllokuar.
Nga ministri i Brendshëm Taulant Balla u tha se “pesë nga alpinistët kroatë të asistuar nga Shërbimi i Kërkim-Shpëtimit Malor të Kosovës, po kthehen tek e mjetet e tyre, në territorin e Malit të Zi. Ndërsa dy turistë të tjerë u transportuan me ndihmën e helikopterit në qytetin e Bajram-Currit”.
“Gjatë operacionit të kërkim-shpëtimit është bërë e mundur edhe nxjerrja e trupit të pajetë të një shtetaseje, e cila kishte humbur jetën si pasojë e rrëshqitjes në një zonë të thepisur dhe me borë”, shkroi ministri Balla. /tesheshi.com/
