Policia e Tiranës ka ndërmarrë një operacion të gjerë dhe publikon në një komunikatë që është zbuluar një arsenal i vërtet luftarak armatimi.
Është dramatike pasi nuk bëhet fjalë për armë përdorimi “dore” nga trafikantët apo keqbërësit që janë përgjithësisht pistoleta apo edhe maksimumi ndonjë kallashnikov, por janë zbuluar predha dhe raketa antitank, të cilët mund të përdoren nga grupe të organizuara që kanë planifikuar operacione reale luftarake apo terroriste.
Në operacionin e koduar “Moglica” janë sekuestruar një masë e madhe municioni dhe pajisjesh ndihmëse shpërthyese që përdoren për vënien e eksplozivëve.
Sipas listës së policisë, janë kapur një numër i madh tritoli por edhe tuba që përdoren për të ndërtuar bomba metalike, të njëjtë me atë që u vra Giovani Falcone në 1992, si dhe pajisje për autobomba.
Ndërkaq, siç bën të ditur policia janë kapur edhe mitrolozë të rëndë, fishekë për këta armë, por edhe mortaja me rreze të mesme veprimi.
Sipas policisë, janë arrestuar dy persona nga Korça: Adil Ismet Mersinllari, 42 vjeç, lindur e banues në Korçë dhe Bledar Bardhyl Muçollari, vjeç 32, nga i njëjti qytet.
Një burim policor i tha tesheshi.com se bëhet fjalë për një organizim i mobilizuar fuqishëm i strukturave kriminale për të përgatitur akte destabilizimi përpara miratimit të reformës në drejtësi, në mënyrë që të anulohet axhenda e zyrtarëve të lartë e SHBA-së që pritet të vijë në Shqipëri në muajin e ardhshëm.
Ja dhe inventari i armatimit:
57 copë kallëpe tritoli të masës 400 gramë secila;
103 copë granata sulmuese “defensive”, me rreze shpërthyese 200m;
100 copë ndezës granatash;
1 granatë-hedhës;
23 predha granatëhedhësi të prodhimit kinez;
20 kuti në formë tubi të dyshuara si eksplozivë me fuqi shumë të fortë;
2 kaseta metalike dhe 1 kuti metalike për mbajtje fishekësh model 56, të kalibrit 7.62 mm;
1640 copë fishekë;
1 shtrat trekëmbësh për mitraloz të rëndë;
216 copë krehëra mbajtës fishekësh model 56, kalibër 7.62 mm, të vajisur dhe me të gjitha pjesët dhe aksesorët e tyre;
3 murtaja me trekëmbësha dhe pjatat kupore;
2 mitralozë të rëndë së bashku me trekëmbëshat mbajtës;
20 pjesë mitralozazh të rëndë të çmontuar;
1 shirit metalik me 250 copë fishekë mitralozi të rëndë model 53;
1 automjet tip “Opel” i llojit “Omega” me targë “KO 6690 B”;
4 aparate celularë të markave të ndryshme.
/tesheshi.com/
