Greqia vendos që të mos e ulë traun në orën 22.00, e të vijojë procedurat e kalimit përgjatë gjithë natës, ndryshe nga sa vendosi pak ditë më parë.
Ky vendim i Athinës u kumtua nga kryeministri Rama, duke shkruar se: “Gjatë gjithë ditës kemi bashkëpunuar me palën greke në çdo nivel. Kemi gjetur mirëkuptim e gatishmëri dhe faktin është se e njëjta situatë është edhe në kufijtë e tjerë të Greqisë. Faleminderit për vazhdimin e punës gjatë natës sot dhe lutemi mirëkuptimin e qytetarëve në vijim”, shkruan kreu i qeverisë.
Nga ana tjetër, Ministria e Jashtme potencoi dhe njëherë atë që kanë vendosur autoritetet greke.
“Duke nisur nga nesër dt. 16 gusht 2020 për të gjithë ata shtetas të cilët hyjnë në Greqi do të zbatohet karantinimi i detyrueshëm 7 ditor. Gjithashtu, nisur që nga dita e hënë, dt. 17 gusht 2020, nga pika kufitare e Kakavijës do të kenë mundësi të kalojnë vetëm 750 persona në ditë, ndërsa nga ajo e Kapshticës vetëm 300 persona në ditë, në fashën orare 06:00 deri në orën 22:00, konform rregullave të vendosura nga pala greke, si pasojë e situatës së krijuar nga COVID-19″, njofton Ministria e Jashtme shqiptare. /tesheshi.com/
