Konflikti i gjatë dhe i përgjakshëm sirian është kthyer rishtas në qendër të vëmendjes pas atij sulmi kimik të së martës që la dhjetëra të vdekur e qindra të plagosur në Han Shejhun, një qendër e banuar në provincën e Idlibit.
Agjencia e lajmeve Associated Press ka zgjedhur ta përcjellë tragjedinë përmes dhimbjes së një babai, që ka humbur në këtë sulm kimik një tufë të afërmish, duke nisur që nga dy fëmijët e tij vocërrakë.
Ai është filmuar me binjakët nëntëmuajsh në krah, teksa po rrugëton me ta mbi një makinë për t’i çuar drejt banesës së fundit.
Aja dhe Ahmedi janë të pajetë në krahët e tij ndërsa ai pëshpërit, “Thoni mirupafshim…”
Abdel Hamid el-Jusef ka treguar se si i ka dërguar fëmijët dhe të shoqen për t’u mjekuar pas sulmit kimik e është kthyer në shtëpi me idenë se do të bëheshin më mirë. Për të gjetur atje trupat e pajetë të dy vëllezërve të tij, të dy nipave e të një mbese, si dhe të fqinjve dhe të miqve.
“Nuk munda të shpëtoj asnjë. Të gjithë ishin tashmë të vdekur,” ka rrëfyer i ngrati.
Tragjedia nuk do të mbaronte këtu për të, pasi më vonë atij do t’i tregohej se i kishin ndërruar jetë dhe fëmijët e bashkëshortja.
Fatkeqësia e tij është veç një pjesëz e dramës së një populli të tërë. Dramë që ka për përgjegjës kryesor Beshar Esadin dhe regjimin e tij, të akuzuar dhe për sulmin e fundit kimik mbi popullatën siriane. /tesheshi.com/
