Kjo është një foto e Mitrovicës e realizuar nga një helikopter i forcave të NATO-s pikërisht në qershorin e vitit 1999 kur ura kryesore mbi lumin Ibër u nda në mes dhe atë bllokadë prej asaj dite askush nuk e hoqi.
Në anën pas bllokadës serbët hynë në shtëpitë e shqiptarëve dhe i nxorën për leckash.
Spitali ishte në anën tjetër të urës; doktorët shqiptarë dhe të sëmurët u kapën dhe u depërtuan me forcë.
U krijua ajo që quhet Mitrovica e veriut apo Mitrovica matanë Ibrit.
Kryetari i komunës së Mitrovicës, i komanduar atëherë nga qeveria e përkohshme e Hashim Thaçit, jetonte në Suhodoll, lagjen në veri, dhe shkonte në punë e kthehej në shtëpi me kallashnikov në krah.
Në qytet nuk mbeti asnjë banor i vjetër, qoftë edhe serb, pasi aty u vendosën të burgosurit ordinerë të hurit e litarit që u mblodhën ngado dhe u krijuan “Rojet e Urës” një strukturë paramilitare e paguar dhe e mbështetur nga Serbia.
Njerëz që kishin detyrën që të mbronin vijën e re kufitare të vendosur në Kosovë me ndihmën e trupave franceze të NATO-s, të cilët bënë sikur nuk kishin ç’u bënin serbëve matanë Ibrit.
Por e gjithë duket se është një lojë që është vendosur diku dhe që si bazë të saj ka krijimin e një ishulli serb në veri të Kosovës me katër komunat e famshme, në formën e një Republika Srbska.
Dhe sigurisht kjo marrëveshje nuk u bë kurrë publike. Kryeministër i Serbisë në atë kohë ishte Zoran Xhingjiç, i supermbështetur nga ndërkombëtarët, nga Gjermania në radhë të parë ku dhe kishte kryer studimet e larta.
Shkrimtari serb, Dobrica Qosiç, i cili ka qenë edhe president i Jugosllavisë i caktuar nga Millosheviçi në vitet ‘90, bënte të ditur në një intervistë vitin e shkuar se ka pasur një marrëveshje mes Xhingjiçit dhe krerëvë të Kosovës për ta bërë këtë. Faktikisht, dr. Rugova nuk jeton më dhe i vetmi i gjallë është Hashim Thaçi i cili duhet të ketë dijeni të plotë mbi atë që thotë Qosiç.
Marrëveshja ishte për të krijuar enklavën serbe në Kosovë e cila në fakt nuk ishte thjesht një enklavë, por ishte Serbi. Për mbi 16 vjet në Mitrovicën e veriut nuk ndihet asnjë institucion i Kosovës.
Serbizimi i Mitrovicës është mbështetur fuqishëm nga UNMIK i cili deri në vitin 2008 e ka udhëhequr pjesën e veriut dhe nuk ka lënë asnjë zyrtar kosovar që të shkojë atje.
UNMIK ngriti Komunën e Veriut, e cila edhe de jure e ndau Mitrovicën.
Ibri u kthye në Brandenburgun modern, ku ndodhej ndarja e perdes së hekurt. Ai ishte turpi i Europës, e cila prej dy vitesh tashmë ndarjet dhe muret po i bën të zakonshme me ngritjen në Hungari të pengesës për të ndaluar emigrantët.
Por BE vendosi që të heqë pengesën e urës që quhej ironikisht “Parku i Paqes” dhe po aty u ndërtua një mur, i cili ishte më keq se hera e parë. Tashmë doli se pas këtij muri do të ndërtohet një tjetër, i cili sipas projektit do të jetë më i bukur dhe ura do të marrë formë tjetër.
Një gjendje statukuoje që nuk ka si durohet. Mitrovica ose duhet vendosur e gjitha nën qeverisjen e Kosovës, ose duhet të ndahet; apo të ketë modelin e Strasburgut një qytet i hapur. Rrugë tjetër nuk ka.
Indeksonline ka bërë të ditur se ka një marrëveshje ku kanë firmosur edhe kryeministri i Kosovës edhe ambasadori amerikan që më 7 shkurt të rrëzohet përfundimisht muri ekzistues por edhe të ndërtohet një i ri pak metra më tutje.
Kjo më shumë se komedi është një dramë që luhet mbi banorët që jetojnë në veriun e Kosovës.
/tesheshi.com/
