Drama e emigrantëve që përpiqen të kalojnë kufirin nga Greqia drejt Maqedoninë, e më pas trenat drejt Serbisë për të kaluar më pas përmes Hungarisë në vendet e BE-së ka kapur faqet e para të medias botërore, ilustruar me foto rrënqethëse.
AFP publikoi sot foto e emigrantëve që shtyhen për të hipur në një tren drejt Serbisë, në Gevgelija në kufirin greko-maqedonas.
Gazetat kryesore europiane kanë botuar fotot e emigrantëve që përpiqen të kacavirren në muret mbrojtëse që shtetet kanë ngritur kundër tyre.
Së fundmi, fotot nga eurotuneli po bëjnë xhiron e botës, ku emigrantët përpiqen të hidhen mbi trena e kamionë për të kaluar në Britani.
BE mori një vendim për shpërndarjen e 32 mijë emigrantëve të mbërritur me anije nga Mesdheu, në vendet e bllokut. Por, kjo shifër nuk ka zgjidhur gjë, pasi numrat e të mbërriturve e që qëndrojnë në strehat e përkohshme në Itali e Greqi e tejkalojnë këtë zgjidhje kompromisi.
Hungaria ndërkaq, ka nisur ndërtimin e murit për të penguar emigrantët të depërtojnë në territorin e saj, në shembullin e mureve të ngjashëm që ekzistojnë në Greqi e në Maltë. /tesheshi.com/
