Nga Musa Mustafa
Siç dihet tashmë, në Parlamentin e Kosovës po bëhet gati një odë – quhet me cinizëm dhe bunker- për ata burra e gra nga grupet parlamentare të PDK-së dhe LDK-së që duan ta kurorëzojnë Thaçin president, pas paralajmërimeve të opozitës se do e trajtojë atë si “Zajednicë”, e që për këtë arsye nuk do e kursejë rebelimin me gaz lotsjellës.
Por shtrohet pyetja: “Dragodani”, siç quhet ndryshe përfaqësia diplomatike në Kosovë, a do pranojë të jetë prezente në odën e sajuar parlamentare?!
Burime të tesheshi.com, konfirmojnë faktin se pikërisht për këtë arsye, sallës alternative po i ndryshohet pamja. Pra, ndërkombëtarët në Prishtinë janë dakortësuar me këtë zgjidhje, e do jenë prezent aty ditën e zgjedhjes së presidentit, ndonëse nuk janë shprehur ende nëse janë dakort me kandidaturën e Thaçit.
Një burim i brendshëm parlamentar i tha tesheshi.com se salla alternative po zbukurohet dhe rregullohet me qëllimin e vetëm që zgjedhja e Presidenit të ri të Kosovës, nëse pamundësohet të bëhet në sallen e rregullt të Kuvendit, atëherë pozita e përbërë nga PDK-LDK e Lista Srpska si dhe kori diplomatik, të vendosen në sallën alternative për të proceduar, por pa opozitën.
“Së paku, vizualisht, salla alternative nuk do të duket e mjerë siç ka qenë deri më tani. Qeveria dhe Kuvendi kanë investuar një shumë të madhe parash në rregullimin e sallës alternative, dhe këto rregullime janë duke i bërë larg vëmendjes së opinionit”, tha burimi, duke saktësuar se asaj i është ndërruar krejtësisht pamja: karriget janë të reja, janë përshtatur edhe ulëset për kryeministrin, ministrat, si dhe për diplomatët ndërkombëtarë të akredituar në Kosovës.
Dhe sipas burimit, kryeparlamentari i Kosovës, Kadri Veseli ka marrë dritën e gjelbër nga ana e disa misioneve ndërkombëtare në Dragodan që të procedojë me seancën parlamentare për zgjedhjen e Presidentit të ri.
“Dragodani e ka siguruar kryeparlamentarin e Kosovës se do të marrin pjesë edhe në sallën alternative në zgjedhjen e Presidentit nëse vjen puna deri tek pamundësimi i mbajtjes së seancës në sallën e rregull të Kuvendi të Kosovës”, tha burimi.
Sipas tij, qeveria e Kosovës dhe parlamenti kanë qënë në ankth pasi që nuk kanë dituar qëndrimin e korit diplomatik në Kosovë se a do të pranojnë të marrë pjesë në sallën alternative për zgjedhjen e Presidentit. /tesheshi.com/
