Draghi lëshon gjuhën ndaj Erdogan, flakë për flakë nga Ankaraja

Kryeministri italian Mario Draghi akuzoi presidentin turk Rexhep Tajip Erdogan për dëshirën për të poshtëruar Presidenten e Komisionit Evropian Ursula von der Leyen këtë javë dhe tha se ai duhet të ishte i hapur me “diktatorët”. Kjo provokoi më pas dënime nga Ankaraja.

Presidenti turk Rexhep Tajip Erdogan priti të martën në Ankara Presidenten e Komisionit Evropian Ursula von der Leyen dhe Presidentin e Këshillit Evropian Charles Michel. Por një spekulim me foto bëri që diplomatja gjermane të dukej e poshtëruar, gjë që u sqarua po me foto.

Por kreu i qeverisë italiane pretendon të kundërtën.

“Unë absolutisht nuk jam dakord me sjelljen e Erdogan ndaj Presidentes von der Leyen … Unë nuk mendoj se ishte një sjellje e përshtatshme dhe më erdhi keq për poshtërimin që von der Leyen u desh të duronte,” u tha Draghi gazetarëve.

“Në këtë drejtim, le t’i quajmë ata si janë – diktatorë – me të cilët duhet akoma të koordinohet, duhet të jetë i hapur kur shprehen pikëpamje dhe mendime të ndryshme,” shtoi ai.

Fill pas kësaj deklarate, Ministria e Jashtme turke i bëri thirrje ambasadorit italian në Ankara lidhur me deklaratën e Draghit, ndërkohë që ministri i Jashtëm Mevlut Çavusoglu kritikoi ashpër deklaratën.

“Ne dënojmë me forcë fjalimin e papranueshëm, populist të kryeministrit italian dhe komentet e tij të shëmtuara në lidhje me presidentin tonë,” shkroi Cavusoglu në Twitter.

Më parë të enjten, Cavusoglu tha se Presidenti Rexhep Tajip Erdogan priti Shefen e Komisionit Evropian Ursula von der Leyen në përputhje me “kërkesat dhe propozimet e Bashkimit Evropian” dhe hodhi poshtë  kritikat se Ankaraja kishte poshtëruar udhëheqësen e BE. /tesheshi.com/