Lulzim Basha ka kohë deri nesër në orën 12.00 sipas orës së Uashington D.C që t’i kthejë përgjigje Ndihmës-Sekretares amerikane të Shtetit, Victoria Nuland për draftin e ri të propozuar prej saj për reformën në drejtësi.
Burime në Partinë Demokratike bënë të ditur se paraditen e së martës është parashikuar një mbledhje e grupit parlamentar të kësaj partie ku pritet me interes qëndrimi i ish-kryeministrit Sali Berisha për propozimin e ri të amerikanëve.
Gjatë ditës së djeshme, qarqe pranë Berishës janë tregur mjaft të kujdeshshëm që të mos dekonsirohen në lidhje me përpjekjen e amerikanëve për të arritur konsensus mes PD-së dhe PS-së.
Të vetmit që janë shprehur kanë qenë qarqet mediatike që kohët e fundit janë identifikuar si pranë kreut të LSI-së, Ilir Meta.
Andi Bejtja, i cili prej një viti ka qëndrime që i përafrohen Metës dhe ka sulmuar më se njëherë ambasadorin e SHBA-së Donald Lu, edhe këtë herë ka qenë jashtë kufirit të etikës.
Bejtja thekson në një koment të tij se Victoria Nuland ka grisur letrën që Lu i ka dërguar deputetëve.
Por që në fakt është e kundërta. Siç ka bërë të ditur në një shkrim tesheshi.com përpara se të mbërrijë Nuland në Tiranë, amerikanët do të përdorin edhe “kërbaçin” që është letra, por edhe “kulaçin” që është një propozim i ri, një draft që mund të rikthejë Lulzim Bashën në kryezë, duke i dhënë edhe një herë shansin që të zgjidhë politikisht një ngërç që rezikon marrëdhëniet mes PD-së dhe SHBA-së.
Por ajo që ka bërë përshtypje është se Nuland nuk është takuar as me Metën e as me Berishën, që realisht janë faktorë të rëndësishëm për çështjen e reformës në drejtësi.
Kësaj herë, zyrtarja e DASH, që ka marrëdhënie konfliktuale me Bashën, i ka kërkuar kreut të PD-së që ditën e mërkurë deri në 12 të drekës, që i bie në 18.00 të mbrëmjes në Tiranë, ajo kërkon përgjigje në Watsap dhe me sms, për të parë se cili plan i reformës duhet të vihet në zbatim.
Sipas draftit të ndryshuar, është vendosur se një komision prej 12 anëtarësh, gjashtë nga PS dhe gjashtë nga PD, duhet të verifikojnë figurën e gjyqtarëve dhe prokurorëve. Por përpara se të kalojë tek ky trup, ata do të dalin “në provim” përpara një komisioni të përbërë nga ndërkombëtarë.
Aktualisht në draft kanë qenë vetëm nga BE dhe, sipas planit të paracaktuar ishte Reinhard Priebe që do ta kryente këtë detyrë; ndërsa tani janë shtuar edhe amerikanët, që përveçse vetingut po merren dhe me rekrutimin e njërëzve që do të punojnë në Byronë Kombëtare të Hetimit. /tesheshi.com/
