Tre deputetët e Partisë Demokratike, Eduard Halimi, Gent Strazimiri dhe Oerd Bylykbashi prezantuan përmes një deklarate për mediat piketat e versionit të tyre për projektligjin e dekriminalizimit të Parlamentit.
Sipas deputetit Oerd Bylykbashi platforma për dekriminalizimin synon të vendosë rregulla të forta që parashikon që ata që janë me rekorde kriminale të mos hyjnë në organet e shtetit, ose nëse janë, të largohen.
“Do ndërhyjmë për të ndërprerë mandantin në momentin kur do të verifikohet dhe konstatohet që është me të kaluar kriminale. Ndërhyrja në Kushtetutë do të jetë me amendamente plotësuese”, tha Bylykbashi.
Dekriminalizimi i Parlamentit ka qenë një nga pikat e shumë kërkuara nga Partia Demokratike si një nga kushtet që ajo të rihynte në Parlament. Pas marrëveshje së arritur në fund të dhjetorit 2014 mes mazhorancës dhe opozitës Kuvendi ka ngritur edhe një Komison të Posaçëm Parlamentar për të prezantuar edhe një ligj se si do të bëhet dekriminalizimi i Parlamentit.
