Një hetim 2-vjeçar i Prokurorisë Antimafia të Kalabrisë ka zbuluar mënyrat e reja të Ndragetas dhe grupeve kriminale shqiptare për trafikun ndërkombëtar të drogës. Malli kap shifrën e 53 milionë euro. Prokurorët: Është vetëm maja e ajsbergut
Heroina blihej direkt nga Afganistani dhe nga Turqia, nëpërmjet ndërmjetësve “vip” dhe me cash në duar. Magazinohej në Shqipëri, së bashku me hashashin e Lazaratit dhe jo vetëm, e më nëpërmjet peshkarexhave italiane të licensuara për të gjuajtur në ujrat tona e dërgonin në brigjet kalabreze, ku malli merrej në dorëzim nga pjesëtarët e klanit të “Ciganëve”, një grupim i pavarur i Ndragetës, e cila është tashmë lobi më i fuqishëm dhe i frikshëm i mafies italaine me aktivitet ndërkombëtar por me qendër në zonën e Kozencës në Itali. Prokuroria antimafia e Kalabrisë, kishte dy vjet që zhvillonte një hetim të shtrirë në disa shtete që nga Amerika Lative, përfshirë dhe në Shqipëri. Vetëm para dy ditësh është kapur një sasi e madhe droge që kap shumën e tmerrshme 53 milionë euro, por që sipas prokurorëve “është vetëm maja e ajsbergut” pasi bëhet fjalë për shuma marramendëse. Prokurorët italianë kanë kapur kokainë, heroinë dhe hashash, e para e ardhur në Itali direkt nga Amerika e Jugut dhe e dyta nga Shqipëria.
Rruga e peshkimit
Trafikantët nuk përdorin më gomone për të transportuar hashashin në brigjet italaine; furnizimi i tregut masiv të Gadishullit Apenin dhe gjithë Europës Perëndimore bëhet me peshkarexha të mëdha por edhe me vaporë të transportimit të mallrave. Siç bënë të ditur autoritetet e Drejtorisë, antimafie të Kalabrisë, të cituar nga novacosenca.com dhe laRepubblica, janë sekuestruar dy peshkarexha, të cilat kishin leje për të peshkuar edhe në ujrat shqiptare, nga ku merrnin ngarkesën e hashashit dhe heroinës nga grupe të fuqishme kriminale shqiptare. Të cilat janë gjithashtu nën hetim, si nga autoritetet shqiptare ashtu dhe ato italiane që kanë bashkëpunuar ngushte në këtë hetim dy vjeçar. Heroina blihej në Afganistan dhe në Turqi nga njerëzit e klanit të “ciganëve” të cilët së bashku me partnerët e tyre shqiptarë, paguanin direkt me çmime “të konkurueshme” heroinën, të cilën e sillnin në Shqipëri nëpërmjet Serbisë, por edhe në rrugë detare nga Greqia e më pas në Shqipëri. Droga ngarkohej më pas me peshkarexha dhe dërgohej në Cassano të Kalabrisë.
Komunikimi bashkëkohor
Truri i klanit të ciganëve kishte prodhuar një metodë komunikimi fenomenale, e cila ka prej dy vitesh që studiohet e zbërthehet në hollësi. Pjesëtarët e grupit kriminal lidheshin jo nëpërmjet telefonit por nga interneti nëpërmjet chat-it, duke përdorur kode të specifikuara, të cilat janë zbuluar falë edhe infiltrimit brenda grupit kriminal nga ana e grupit të hetimit, i cili nuk është shtrirë vetëm në Itali, por edhe në Shqipëri.
Gjatë operacionit “gentlemen” janë arrestuar 33 persona, sekuestruar sasi e madhe armësh dhe droge, si dhe një sërë të mirash materiale. Në këtë operacion janë arrestuar edhe një numër shtetasish shqiptarë, bashkëpunëtorë të klanit të ciganëve. Ndër emrat e arrestuar janë Fisnik Smajlaj dhe Zamir Oruçi, persona me precedentë penalë në Shqipëri dhe bashkëpunëtorë të mafias kalabreze.
“Koleksionistë apo trafikantë antikuaresh”
Ndër “xhevahiret” që ka sekuestruar prokuroria italiane në operacionin “Gentelmen” përveç një parku gjigand makinash superluksi si Ferrari, Aston Martin, Smart Forufur, Mercedes ML, Chaverlet camaro, Land Rover etj, janë zbuluar dhe një koleksion i plotë antikuaresh dhe gjetjesh arkeologjike. Në strehën e klanit kalabrez, janë gjetur antikuara të vjedhura në Shqipëri dhe vende të tjera. Konkretisht janë sekuestruar 8 objekte bronzi të lashta dhe 10 objekte në qeramikë./tesheshi.com/
