Dy agjenci të Kombeve të Bashkuara dhe me dhjetëra organizata të të drejtave të njeriut, e grupe ligjore, fetare e mjekësore kanë kërkuar që qeveria e Australisë të ndalë vuajtjet e azilkërkuesve dhe refugjatëve në regjimin e saj të procesimit jashtë vendit, e kjo pas publikimit të dosjes Nauru.
Sipas një hetimi të publikuar nga “The Guardian” me dokumente të rrjedhura nga zyrat shtetërore australiane, nga qendra e azilkërkuesve në ishullin e Paqësorit, Nauru raportohen incidente të detajuara të abuzimit dhe traumës që përjetojnë azilkërkuesit, në pjesën më të madhe të rasteve nga njerëz të jashtëm, por edhe nga anëtarë të stafit të qendrës. Dokumentet mbulojnë një periudhë dyvjeçare dhe aty flitet edhe për abuzime me të miturit.
Komisioneri i lartë i OKB-së për refugjatët shprehu shqetësimin e thellë nga dyshimet e ngritura dhe theksoi se të gjithë refugjatët dhe azilkërkuesit duhet të zhvendosen nga Nauru në një vend tjetër me kushte njerëzore.
Në një deklaratë, thuhet se dokumentet e publikuara janë gjerësisht në një linjë me shqetësimin e vazhdueshëm të UNHCR-së lidhur me shëndetin mendor dhe kushtet e përgjithshme të refugjatëve dhe azilkërkuesve në Nauru.
Zyrtarët e UNHCR ishin të pranishëm, edhe pse nuk kishin biseduar me të, kur një 23-vjeçar, refugjat iranian, Omid Masoumali, lagu veten me benzinë dhe i vuri flakën në shenjë proteste ndaj kushteve në ishull, e kjo ndodhi në maj të këtij viti.
Pas vonesave në fluturimin e tij nga Nauru për trajtim mjekësor, Masoumali ndërroi jetë në një spital në Brisbane, dy ditë më pas.
Pas publikimit të dosjeve të Nauru, UNHCR tha se kërkohen urgjentisht zgjidhje të përhershme dhe njerëzore për azilkërkuesit dhe refugjatët që mbahen në ishull.
Në dokumente duket qartë trauma shkatërruese dhe abuzimet ndaj fëmijëve në qendrën e ndalimit të azilkërkuesve dhe refugjatëve jashtë territorit australian. Dokumentet kanë dalë nga zyrat e regjimit të emigracionit.
8 mijë faqe raporte të publikuara tregojnë si asnjëherë më parë për agresion, abuzime seksuale, përpjekje për vetëvrasje, abuzime me fëmijët dhe kushte të tmerrshme jetese për refugjatët dhe azilkërkuesit që mbahen nga qeveria australiane, në një panoramë rutinë të mosfunksionimit të qendrës dhe mizorisë.
Më shumë se gjysma e 2116 raportimeve, përfshijnë abuzime me fëmijët, edhe pse ata përbëjnë vetëm 18 për qind të atyre që mbaheshin në Nauru në kohën e përpilimit të raporteve.
Një drejtuese e lartë e Amnesty International që mori përsipër një mision zbulimi për të hetuar qendrën, tha se raportimet e publikuara tregojnë hapur një sistem mizorie që ndërsa është marramendës për shkallën e përfshirjes, është edhe tepër dërrmues për autoritetet australiane që u përpoqën shumë ta mbanin sekret.
“Australia ka aktivizuar një nga mbulimet më të suksesshme që unë kam qenë dëshmitare në karrierën time të dokumentimit të shkeljes së të drejtave të njeriut”, tha zyrtarja e Amnesty, Neistat. “Ata kanë thënë vazhdimisht se këto lloj abuzimesh nuk ndodhnin. Ata gënjyen”.
Shoqata mjekësore Australiane apeloi për ngritjen e një trupe hetimi, tërësisht të pavarur nga qeveria, që do të bëjë vlerësimin e menjëhershëm të shëndetit dhe kushteve të jetesës së çdo personi në qendrën e ndalimit në ishull.
Përgatiti: Juli Prifti – /tesheshi.com/
