Një oficer policie u arrestua nga kolegët e tij me dyshimin se dekonspironte aksionet e policisë në kapjen e personave që dyshohen për vepra të ndryshme penale.
Prokuroria zbardhi detaje nga hetimi për Engrit Hënaj, inspektor policie në Tiranë, i arrestuar për veprën penale të “Shpërdorimit të detyrës”.
Dosja e prokurorisë
Në bazë të veprimeve proçeduriale të kryera nga Prokuroria e Kavajës, në vijim të informacionit të dërguar nga Shërbimi për Çështje të Brendshme dhe Ankesa (SHÇBA), ka rezultuar se:
Prokuroria e Kavajës ka pasur person nën hetim shtetasin Fation Lila, i dyshuar për vjedhje në bashkëpunim, me pasoja të rënda. Ai dyshohej se, në bashkëpunim me persona të tjerë, kanë vjedhur tre automjete në një kompleks magazinash në Kavajë.
Ndaj tij, me kërkesë të Prokurorisë së Kavajës, gjykata caktoi masën e sigurisë “arrest me burg”, vendim i cili për disa kohë nuk u bë e mundur të ekzekutohej, pasi ai fshihej.
Gjatë kohës që ka qenë në kërkim, ai komunikonte shpesh me një punonjës policie, i cili më pas rezultoi se ishte shtetasi Engrit H.
Ky i fundit e informonte të kërkuarin që në fazat e para të hetimit për vjedhjen, pra që në momentin kur ndaj tij nuk kishte dalë akoma masa e sigurimit.
Në komunikimet telefonike ndërmjet tyre, punonjësi i policisë ishte i pari që e informoi se emri i Fation Lilës ishte ndër të dyshuarit kryesorë për vjedhjen e automjeteve.
Gjithashtu, punonjësi i policisë e informoi që ndaj tij kishte dalë masa e sigurisë “arrest me burg”.
Pas disa javësh, policia e Kavajës arrestoi Fation Lilën dhe ndaj tij tashmë ka nisur procesi gjyqësor pranë Gjykatës së Kavajës.
Ndërkohë, Prokuroria vijoi hetimet për personin që e informonte Lilën gjatë kohës që ai ishte në arrati. Në bazë të veprimeve proceduriale, rezultoi se ai ishte shtetasi Engrit H., i cili ishte punonjës policie pranë Drejtorisë së Policisë së Tiranës.
Në këto kushte, prokuroria e Kavajës kërkoi caktimin e masës së sigurisë “arrest me burg” për shtetasin Engrit H, e cila u pranua nga gjykata dhe u zbatua nga ana e SHÇBA-së.
Njoftimi i policisë
SHÇBA ka arrestuar punonjësin e policisë Inspektor Engrid Hënaj, me detyrë trup shërbimi në Repartin “Shqiponja” në D.P.V. Tiranë.
Ky arrestim u bë i mundur pas një hetimi të përbashkët me Prokurorinë e Rrethit Gjyqësor Kavajë, duke aplikuar metoda speciale të hetimit, për veprën penale të “shpërdorimit të detyrës” dhe “përkrahje të autorit të krimit”, parashikuar nga nenet 248 dhe 302 i Kodit Penal.
Nga hetimi ka rezultuar se ky punonjës policie në disa raste ka bashkëpunuar me shtetasin F.L, i arrestuar për veprën penale të “vjedhjes në bashkëpunim me shumë se një herë”, parashikuar nga neni 134/2.
SHÇBA ka siguruar prova se kundrejt marrjes së shumave të ndryshme të parave dhe favoreve të tjera, punonjësi i policisë, në shumë raste i jepte informacione mbi veprimet policore që kryheshin, shtetasit të mësipërm dhe personave të tjerë të implikuar ne veprimtari kriminale. Vazhdojnë hetimet për implikimin e punonjësve të tjerë të policisë të përfshirë. /tesheshi.com/
