Ka folur së fundi dhe presidenti Meta në lidhje me Dosjen 339, pjesë nga përgjime të së cilës u publikuan nga Bild-i gjerman.
Kreu i shtetit, pak vite më parë personazh i një video-përgjimi me një komunikim shumë më kompromentues se ai mes personazheve në dosje – pra videoja e famshme Meta – Prifti – e ka kapërcyer këtë kompleks dhe ka folur nga pozita të pastra morale.
“Presidenti i Republikës, Ilir Meta ka ndjekur me shumë vëmendje dhe shqetësim të thellë publikimet e gazetës së njohur gjermane ‘Bild’, të interceptimeve të bisedave telefonike mes disa funksionarëve publikë në Qarkun e Durrësit me persona me precedentë kriminal gjatë procesit të zgjedhjeve parlamentare të vitit 2017″, nis mesazhi i Metës, duke vijuar më pas me një sulm ndaj organit të akuzës, jo për nxjerrjen e sekretit hetimor, por për urdhërin që pjesë të dosjes të mos publikohen në media.
“Presidenti i Republikës gjithashtu është njohur edhe me reagimin e organit të Prokurorisë ndaj publikimit të këtyre interceptimeve, që nëpërmjet një urdhërese kërkon ndalimin e publikimit të tyre në media.
Presidenti i Republikës duke shprehur shqetësim të thellë në lidhje me këtë urdhër të Prokurorisë pranë Gjykatës së Shkallës së Parë për Krime të Rënda thekson se:
Referencat ligjore të nenit 104 të Kodit të Procedurës Penale, nenit 295/a, paragrafi i 3-të të Kodit Penal, të përdorura nga organi i Prokurorisë përcaktojnë detyrime ligjore që i adresohen për zbatim punonjësve të shtetit dhe nxjerrja e një urdhëri të tillë, indirekt intimidon median e lirë, ç’ka është e papranueshme për një shoqëri demokratike.
Kushtetuta e Republikës së Shqipërisë, mbron të drejtën themelore të qytetarëve për informim. Neni 22 i saj sanksionon qartë se :
1.Liria e shprehjes është e garantuar.
2.Liria e shtypit, e radios dhe e televizionit është e garantuar.
3.Censura paraprake e mjeteve të komunikimit ndalohet.
Ndërsa neni 23, pika 1 sanksion qartë se: E drejta e informimit është e garantuar.
Asnjë urdhër nuk mund të ketë autoritet mbi këtë të drejtë themelore kushtetuese të medias së lirë e të pavarur”, argumenton kreu i shtetit.
Më pas, ai fton për hetim, por jo aq paanshmërisht. Meta e konsideron definitiv e jo thjesht dyshues, faktin se nga ato përgjime ka vërtet aferë për manipulim votimi.
“Presidenti i Republikës, inkurajon organin e Prokurorisë të hetojë me përparësi, paanësi dhe profesionalizëm këtë dosje të bërë publike por edhe çdo dosje tjetër që ka të bëjë me manipulimin e zgjedhjeve apo intimidimin e qytetarëve me qëllim deformimin e vullnetit te tyre të lirë dhe shtrembërimin e rezultatit të zgjedhjeve.
Çdo vonesë në hetimin dhe zbardhjen e së vërtetës nga ana e organit të Prokurorisë, nuk i shërben interesit publik të përgjithshëm.
Presidenti i Republikës mbështet reagimin e sotëm të Unionit të Gazetarëve Shqiptarë lidhur me këtë çështje dhe inkurajon të gjithë gazetarët kurajozë në denoncimin e fakteve dhe të dhënave kriminale.
Rikthimi i besimit tek zgjedhjet e lira dhe të ndershme është vendimtar jo vetëm për bashkëjetesën tonë të shëndetshme demokratike si shoqëri, por edhe për çeljen e negociatave për antarësimin në Bashkimin Evropian sa më parë”, përfundon mesazhi i Metës.
Ndërkohë, edhe për vetë këtë të fundit thuhet se ekziston një dosje me përgjime, ku para zgjedhjeve të vitit 2009 ai ka kontaktuar Kastriot Ismailajn e CEZ-it duke u kërkuar një sasi të madhe parash. Kjo dosje, sipas gazetarit Artan Hoxha, është mbyllur me kohë nga Prokuroria, që në kohën e Adriatik Llallës. /tesheshi.com/
