Avokatët mbrojtës të deputetit Tom Doshi kanë ankimuar në Gjykatën e Lartë, masën e ndalimit të Prokurorisë, duke kërkuar lirimin e menjëhershëm të klientit të tyre.
Në një prononcim për mediat, pas daljes nga Gjykata, avokati mbrojtës Vladimir Meçe u shpreh se është kërkuar lirimi i Doshit, pasi ndalimi i tij është i paligjshëm. Por, kërkesa e avokatëve,nuk mund të shqyrtohet nga Gjykata e Lartë, pa patur më parë, një dosje nga Prokuroria.
Ndërkaq, avokatët e Mark Frrokut theksojnë se ai ende është i befasuar nga arrestimi i tij dhe nga fakti që është implikuar në historinë e atentatin që Doshi pretendon se kryeparlamentari Meta kishte urdhëruar ndaj tij. Qëndrimin që Frroku ka mbajtur para prokurorëve dhe oficerëve gjyqësorë në Drejtorinë e Policisë së Tiranës, u bë publik nga dy avokatët e tij Saimir Vishaj dhe Genc Gjokutaj. Në një prononcim për mediat pas marrjes në pyetje të deputetit Frroku, avokatët thanë se prangosja e klientit të tyre është e jashtëligjshme dhe se në seancën gjyqësore për masën e sigurisë do të kërkojnë lirimin e tij. Saimi Visha përsëriti disa herë qëndrimin e klientit të tij, duke thënë se Mark Frroku nuk ka pasur asnjë dijeni për atentatin që Doshi pretendon se do të bëhej ndaj tij gjashtë muaj më parë.
“Mark Frroku është i befasuar se si persona të tjerë kanë sajuar vrasje të porositur gjoja nga kryetari i Kuvendit. Nuk kemi asnjë lidhje me akuzat fantazmë në lidhje me ndonjë vrasje nga kreu i Kuvendit. Klienti ynë përjashtohet në mënyrë kategorike nga ndonjë dijeni për porositje të ndonjë vepre të tillë, nuk e di kush i sajon këto gjëra, akuza të fabrikuara nga njerëz të papërgjegjshëm”, u shpreh Vishaj.
Ai tha se është i bindur në paligjshmërinë e arrestimit por shtoi se nuk do të dorëzojë kërkesë në Gjykatën e Lartë për lirimin e Frrokut, por se do t’i shprehë argumentet në seancën gjyqësore që pritet të mbahet të shtunën.
