Kryeministri Mustafa, më në fund është dorëzuar duke pranuar se vendi mund të shkojë në zgjedhje të reja sivjet. Ai ka pranuar mund të ndodh një opsion i tillë nëse Kuvendi nuk e ratifikon marrëveshjen për Demarkacionin e kufirit me Malin e Zi, si kusht i domosdoshëm për liberalizimin e vizave.
Mustafa nuk ka dhënë datë të saktë se kur do ridërgohet marrëveshja në fjalë në Kuvend, duke thënë se kjo do ndodh pas konsultimeve që do kenë me partnerët e koalicionit.
“Në momentin kur merremi vesh për kohën, ne do të procedojmë në Qeveri me projektligjin për ratifikimin e marrëveshjes. Do të shkojmë në Kuvend. Kuvendi duhet ta merr përgjegjësinë për këtë”, ka deklaruar Mustafa në një intervistë për radio “Evropa e Lirë”.
Kujtojmë se sot edhe kreu i PDK-së, njëherit kryekuvendari Kadri Veseli ka lënë të hapur mundësinë e shkuarjes në zgjedhje të parakohshme, duke thënë se “s’ka kuptim vazhdimi i koalicionit nëse s’ka vendimarrje në Kuvend e qeveri”. /tesheshi.com/
