Ministria e Drejtësisë, e drejtuar nga Dhurata Hoxha, është dorëzuar pas presionit të madh si nga opozita ashtu dhe shoqëria civile për ndryshimet e paralajmëruara në Kodin Penal, që prekin lirinë e shprehjes.
“Duke marrë parasysh shqetësimet e ngritura nga shoqëria civile, Ministria e Drejtësisë njofton opinionin publik se me efekt të menjëhershëm tërheq nenet e propozuara 134/C (“fyerja ndaj shtetit dhe simboleve të shtetit”) dhe 134/D (“fyerja ndaj organeve kushtetuese”) nga propozimi për plotësimin dhe ndryshimin e Kodit Penal të Republikës,” thuhet në njoftim.
Ministria e Drejtësisë më tej thotë se i merr seriozisht shqetësimet e shoqërisë civile, andaj pohon se është e gatshme t’i bëjë idetë dhe propozimet e tyre pjesë të vendimeve të saj.
“Ministria e Drejtësisë synon të vazhdojë dhe të thellojë bashkëpunimin me shoqërinë civile të Kosovës në të gjitha fushat që janë në përgjegjësinë e saj, dhe do të sigurojë që shoqëria civile do të përfshihet në të gjitha proceset e politik-bërjes dhe hartimit të legjislacionit, duke përfshirë Kodin Penal, Kodin e Procedurës Penale dhe tërë rishikimin funksional të sistemit të sundimit të ligjit në Kosovë. Jemi të bindur se vetëm përmes një bashkëpunimi të ngushtë midis institucioneve publike dhe shoqërisë civile mund të realizohen veprime që janë në dobi të Kosovës dhe të gjithë qytetarëve të saj, dhe Ministria e Drejtësisë mbetet e përkushtuar në këtë drejtim,” shpjegon njoftimi i Ministrisë së Drejtësisë së Kosovës. /tesheshi.com/
