Dorëzohet “Lë Pen-i” shqiptaro-amerikan

Evi Kokalari, një lloj Marine lë Pen-i shqiptar e shfaqur krah Berishës gjatë Foltoreve të këtij të fundit, është dorëzuar.

Ajo ka vendosur që të mos merret më me politikën në Shqipëri, edhe pse duket mjaft stoike në bindjen dhe aktivizimin e saj politik, me synimin që ndoshta të ishte ajo, si nëj shqiptaro-amerikane, pasuesja e Bashës nëse Berisha do ia merrte partinë këtij të fundit.

Ajo ka shpallur tërheqjen e saj të plotë, duke shkruar:

“Kam vendosur të distancohem pak nga politika në Shqipëri. Megjithëse me mëndje dhe zemër jam aty ku vazhdon lufta për një opozitë të fortë, dua t’i kthehem jetës time në Amerikë që kam që në shtator që e kam lënë komplet mbas dore.

Do vazhdoj të jem në komunikim të vazhdueshëm me anëtarët e Komisionit të Rithemelimit, gjithsesi jo më aq aktive sa më parë.

Me gjithë sulmet e katër muajve të fundit, një gjë është e padiskutueshme – miqësitë që kam krijuar në Tiranë vërtet më kanë ngrohur zemrën, dhe jo vetëm, mbështetjen që kam marrë nga njerëzit që kam takuar çdo ditë në rrugët e Tiranës dhe gjatë foltoreve, vërtet i kanë dhënë kuptim sakrificës së muajve të fundit.

Bashkëatdhetarëve të mi në Diasporë; dua t’ju them që populli ynë është i varfër, kështu që angazhohuni seriozisht se kanë vërtet nevojë për ndihmë.

Lërini mëritë dhe urrejtjen e së kaluarës dhe mbështesni ata që po luftojnë për ditë për të shpëtuar pluralizmin.

Ndërkohë do vazhdoj të komunikoj opinionet e mia nëpërmjet medias sociale.

Duke ju falenderuar të gjithëve për mbështetjen tuaj, Përzemërsisht, Evi”.

Kështu, vetëlargohet një figurë tejet e diskutueshme, e shfaqur befas në opozitën shqiptare, me mungesa të theksuara në kualitetin ligjërimor politik, aq më pak publik, pa ndonjë aftësi apo talent të dukshëm për të qenë një figurë imponuese.

Dhe, i vetmi profil që mund të kish, edhe për shkak të ngjashmërisë në pamje, ishte ai i një Marine le Pen, por me mundësi të pakta për të patur ithtarë siç politikania nacionaliste franceze. /tesheshi.com/