Ish-vetëvendosësit Ajnishahe Halimi, Fatos Aliu, Arben Gecaj dhe Leon Duhanaj sot edhe zyrtarisht i janë bashkuar Partisë Demokratike të Kosovës, subjekt të cilin e kritikuan jo pak.
Zyrtarizimin e tyre në parti e bëri kreu i PDK-së Kadri Veseli, i cili organizoj një konferencë për media për anëtarët e “Fraksion +”, të cilët u dorëzuan dhe vendosën të bëhen bashkë me të fortin.
Sigurisht që nuk u bashkuan për parime, por synimi mund të jetë që të jenë pjesë e listës zgjedhore të PDK-së në zgjedhjet e ardhshme parlamentare.
Ajnishahe Halimi, e cila dikur ulej pranë Albin Kurtit, ish liderit të VV-së, sot për herë të parë qëndroi afër Kadri Veselit.
Halimi, e cila si asambleiste e PDK-së në Skenderaj në vazhdimësi hodhi akuza në drejtim të kryetarit Sami Lushtaku, njërit nga njerëzit më të fuqishëm të PDK-së, për uzurpim të aseteve publike, sot në konferencë për media tha se arsyeja pse “Fraksion +” u bashkua me PDK-në është sepse kjo parti është shtet-formuese dhe shtet-ndërtuese.
“Duke pasur parasysh punën e PDK-së, ky është qëllimi që të bashkohemi dhe të gjejmë hapësirë për të kontribuar në ndërtimin dhe formimin e këtij shteti. Kjo bashkëngjitje nuk është artificiale, por do të ketë një proces gradual”, ka theksuar Halimi.
Kurse, kreu i PDK-së theksoi se Veseli tha se “Fraksion +” ka gjetur gatishmërinë për t’iu bashkuar konceptit të PDK-së.
“Ky nuk është bashkim i njerëzve të pakënaqur, por bashkim në konceptin e PDK ku duhet të jenë edhe shumë njerëz të tjerë. Do të kemi edhe ardhje të reja të tilla”, tha ai. /tesheshi.com/
