Presidenti i SHBA Donald Trump foli publikisht për herë të parë pasi Kongresi konfirmoi fitoren në zgjedhjen e Joe Biden, por edhe trazirat e shkaktuara nga mbështetësit e tij me atë rast.
Trump tha se tani po e kthen vëmendjen e tij në një transferim të qetë dhe të rregullt të pushtetit.
“Kongresi ka konfirmuar rezultatet. Administrata e re do të inaugurohet në 20 janar. Tani jam përqendruar në sigurimin e një kalimi të qetë, të rregullt dhe të përsosur të pushtetit. Ky është një moment për shërim dhe pajtimin,” tha Trump në një mesazh me video të postuar në Tëitter ditën pasi mbështetësit e tij sulmuan Kapitolin duke u përpjekur të parandalonin konfirmimin e fitores së Biden-it.
Trump dënoi dhunën, duke thënë se protestuesit “përdhosën selinë e demokracisë amerikane”.
Ata që kanë kryer dhunë nuk përfaqësojnë vendin tonë dhe ata që kanë thyer ligjin do të paguajnë, nënvizoi ai.
“Shërbimi ndaj jush si president ka qenë nderi më i madh i jetës time. Dhe unë u them të gjithë mbështetësve të mi të mrekullueshëm: e di që jeni zhgënjyer, por dua që ju të dini se udhëtimi ynë i pabesueshëm sapo ka filluar,” tha presidenti aktual i SHBA.
Deklarata e Trump pasoi thirrjet nga demokratët kryesorë, Kryetarja e Dhomës Nancy Pelosi dhe udhëheqësi i Senatit Chuck Schumer, deri te Zv.Presidenti Mike Pence dhe kabineti i Trump, për të zbatuar Amendamentin e 25-të që parasheh heqjen e presidentit menjëherë nga detyra.
Nëse kjo nuk do të ndodhë, Pelosi ka njoftuar se ka shumë të ngjarë të mbledhë Dhomën e Përfaqësuesve për të filluar një proces me akuzë ndaj presidentit mbi rolin e tij në trazirat e së mërkurës, ku u vranë dhe pesë vetë, përfshirë një oficer policie të Kapitolit. /tesheshi.com/
