Është dorëhequr krejt papritmas kryebashkiakja e komanduar e Himarës, ish-nënkryetarja e atyshme, Blerina Bala.
E reja që zëvëndësoi Jorgo Goron gjithashtu të dorëhequr, i cili është pas hekurave nën akuzë nga SPAK, ka dhënë një shpjegim publik se pse nuk mund të vijojë më të drejtojë Himarën, vetëm pas disa muajsh në krye të saj.
“Të nderuar banorë të Himarës!
Të nderuar anëtar të Këshillit Bashkiak Himarë!
Ndjehem e nderuar dhe e privilegjuar që mu dha mundësia të drejtoja Bashkinë Himarë për këtë periudhë aq sa të vështirë dhe të mrekullueshme për mua.
Gjatë kësaj kohe jam përpjekur të punoj me përkushtim dhe e palëkundur, për të trajtune dhe zgjidhur çështjet që janë paraqitur para meje.
Sidoqoftë për shkaqe personale që kërkojnë kohën dhe vëmendjen time të plotë, me keqardhje ju njoftoj pamundësinë time për të vazhduar detyrën e Kryetares së Bashkisë Himarë që mu besua dhe nga Këshilli Bashkiak Himarë.
Me këtë letër, sot zyrtarisht paraqes dorëheqjen time të parevokueshme nga pozicioni i Kryetares së Bashkisë Himarë.
Dua të shpreh falenderimet dhe mirënjohjen më të thellë stafit të Bashkisë Himarë, Këshillit Bashkiak Himarë dhe cdo banori të Himarës për mbështetjen dhe për vlerat njerëzore që kemi ndarë gjatë kësaj periudhe.
Përulësisht kërkoj të pranoni mirënjohjen time të sinqertë, për bashkëpunimin dhe për cdo gjë që kemi arritur së bashku.
Me respekt, Blerina Bala!”.
Tashmë, PS-së që e ka këtë bashki, do i duhe të zgjedhë një emër tjetër të komanduar për të pasuar znj. Bala në detyrë. /tesheshi.com/
