Ka dhënë dorëheqjen kryetari i Gjyqtarëve të EULEX-it, Malcolm Simmons. Lajmin e ka publikuar e përditshmja franceze “Le Monde”.
“Javëve të fundit, kam raportuar disa raste korrupsioni brenda misionit. Në veçanti, kam ngritur çështjen e hakimit të e-mailit tim nga një tjetër gjyqtar i EULEX-it. Kam kërkuar nga Zyra Britanike për Marrëdhënie me Jashtë dhe BE-ja të dërgojnë rastin në polici. Të dyja refuzuan të më mbështesin”, ka thënë Simmons.
Ai ka vazhduar me akuza të tjera ndaj misionit, duke e cilësuar tërësisht politik.
“EULEX-i nuk është misioni i promovimit të sundimit dhe ligjit. Është një mision politik. Kushdo që mendon ndryshe, është naiv ose i marrë”, ka thënë Simmons.
Ai ka qenë gjyqtar që nga fillimi i misionit më 2008-ën derisa nga viti 2014 ka kryesuar asamblenë e Gjykatësve të EULEX-it.
Për akuzat e Simos ka reaguar edhe Bashkimi Evropian i cili përmes zëdhënëses Maja Koçijançiç, ka thënë se BE-ja njëkohësisht edhe EULEX-i kanë zero tolerancë për akuzat dhe për sjellje të pahijshme të të gjithë anëtarëve të misionit.
Sipas saj akuzat janë hetuar dhe raportuar në bordin disiplinues
“Akuzat janë hetuar nga një gjyqtar i pavarur dhe disa nga të gjeturat janë pranuar në bordin disiplinues dhe dua të theksoj se të gjitha procedurat e parapara në kod janë ndjekur me përpikëri. Nuk mund të flas enkas për ndonjë akuzë dhe për hetimet që po vazhdojnë”, ka thënë Koçijançiç. /tesheshi.com/
