Gerti Bogdani, Sekretar i Marrëdhënieve më Jashtë në PD, ka dhënë dorëheqje, duke u zëvëndësuar menjëherë nga Basha në postin e lënë bosh.
Në një mesazh të tij në FB, Bogdani thotë se do vijojë të jetë kontributor politik, por pa sqaruar se ç’rol konkret do të ketë.
“Si rezultat i nje kohe te gjate ne kete pozicion, besoj ka ardhur koha per te pranuar sfida dhe angazhime te reja, per te vazhduar te jap kontributin tim per forcimin e metejshem te Partise Demokratike. Ju garantoj ju dhe çdo anetar te Partise Demokratike qe angazhimi dhe perkushtimi ne keto sfida te reja, do te jete gjithmone maksimal dhe gjithmone duke ruajtur parimin se te drejtat, mireqenia dhe shpresa e munguar, jo vetem e çdo demokrati, por mbi te gjitha e çdo qytetari te ndershem shqipetar, do te jete ylli polar i punes sime. Ndaj, ne kete kuader i kam kerkuar kryetarit te Partise Demokratike te pranoje doreheqjen time nga pozicioni i Sekretarit te Marredhenieve me Jashte te Partise Demokratike”, shkruan zyrtari i PD-së, i cili e nisi karrierën politike si zëdhënës i Bashës kur ky i fundit drejtonte Ministrinë e Transporteve.
Dhe menjëherë nga PD vjen njoftimi i zëvëndësimit të Bogdanit.
“Në detyrën e Sekretarit për Marrëdhëniet Ndërkombëtare të Partisë Demokratike, kryetari Basha ka emëruar zotin Arben Kashahu, i njohur nga profesionistët e fushës së marrëdhënieve ndërkombëtare si drejtues i suksesshëm i ekipit negociator për Marrëveshjen e Stabilizim Asociimit mes qeverisë shqiptare dhe Bashkimit Evropian.
Kashahu është në profesion jurist dhe pas përvojës 5 vjeçare si drejtues i lartë në Ministrinë e Integrimit, ka punuar në disa organizata dhe shoqëri ndërkombëtare”, thuhet në njoftimin zyrtar. /tesheshi.com/
