Një tetëshe drejtorësh të mëdhenj në Shkodër, emëruar nën siglën e PS-së, kanë dhënë dorëheqje pas mesazhit të kreut të mazhorancës Edi Rama, për ikje të të gjithë drejtorëve meshkuj, një zhvillim që tregon ngërçin e socialistëve lokalë pas rastit të Valdrin Pjetrit. Po ashtu, është një zhvillim që reflekton dhe ndarjet klanore mes Tom Doshit dhe Ditmir Bushatit, e parë kjo dhe në reagimin e këtij të fundit pas mbledhjes së kryesisë së PS të mërkurën në mbrëmje.
Drejtorët e dorëhequr janë:
Kadri Ymeri – Drejtor i DAR Shkodër
Ardian Dajti – Drejtor i Spitalit të Shkodrës (e pakonfirmuar)
Mustaf Kraja – Drejtor i Bujqësisë Shkodër
Luan Heta – Drejtor i HEC Vau Dejës
Edmond Emini – Drejtor i Postës Shkodër ( Kryetar i PS Shkodër )
Agim Dardha – Drejtor Administrata e Zonave te Mbrojtura ne Shkoder
Astrit Beci – Drejtor i Shendetit Publik Shkoder
Fuat Alibali – Drejtor i OST
E këtë zhvillim, PD nuk e sheh thjesht si brendapartiak, duke zgjedhur të reagojë.
Me një urdhër të paprecedent në historinë edhe të vendeve më të prapambetura të Afrikës, Edi Rama ka nisur instalimin e partisë – shtet duke filluar nga Shkodra, ekzaktësisht siç bënë komunistët në 1945.
Urdhri për dorëheqje në bllok të të gjithë drejtorëve rajonalë në Qarkun e Shkodrës, është totalisht antiligjor dhe në shkelje flagrante të Kushtetutës, Statusit të Nëpunësit Civil dhe Kodit të Punës. Me një urdhër të tillë, Rama po zëvendëson njërën bandë me një bandë tjetër.
Pasi të lirohen postet e drejtorëve, do të jetë “mëkëmbësi” i Edi Ramës në Shkodër, Tom Doshi, që do të emërojë drejtorët e rinj rajonal, në koordinim të plotë me kreun e bandës së Rilindjes, kryeministrin e fatkeqësisë kombëtare”, thuhet ndër të tjera në një deklaratë të PD-së. /tesheshi.com/
