Pas lajmit për dorëheqjen e kryebashkiakut të Kavajës, Elvis Roshi, ka reaguar Kryeministri Edi Rama si dhe eksponentë të Partisë Demokratike.
Vetë Rama është shprehur i palëkundur në bindjen e tij se kur hyn në mes një problem me drejtësinë, vendimmarrja s’ka si të ketë më asnjë ngjyrë tjetër përveçse bardhezi.
“Kam qenë dhe mbetem i prerë në këtë pikë: Fajësinë nuk e caktojnë partitë as mediat po gjykatat”, – thotë Kryeminsitri në një deklaratë të publikuar në faqen e Kryeministrisë.
Ai shton se dorëheqja e Elvis Roshit sot, u jep të gjithëve një tjetër provë të qartë se në Partinë Socialiste në këta 32 muaj qeverisje ka fituar një parim i panegociueshëm.
“Kur një fakt i provuar nxjerr në pah një problem që i takon drejtësisë, pushteti ynë nuk futet kurrë mes drejtësisë dhe cilitdo ndër ne. Duke e konsideruar të përfunduar shërbimin e Elvis Roshit si kryetar i Bashkisë së Kavajës, do të vazhdoj ta mbështes me gjithë zemër projektin ambicioz të Rilindjes Urbane të Kavajës”, – thotë Kryeministri.
Nga ana tjetër, ish Kryeministri Sali Berisha dënon vetë Ramën si kryekriminel për futjen e kriminelëve në parlament dhe në pushtetin vendor.
“Duke dënuar dhe një herë me ashpërsinë më të madhe Edi Ramën, si kryekriminel për futjen e kriminelëve në parlament dhe pushtetin vendor, i bëj thirrje të shpjegohet publikisht për motivet e maskimit të tij me ndryshimin e emrit nga Edvin ne Edi”, – shkruan Berisha në Facebook. /tesheshi.com//tesheshi.com/
