Për kryedemokratin Basha, dorëheqja e kreut të SHISH-it, Visho Ajazi Lika, nuk është gjë tjetër veçse pasojë e presionit që ky i fundit duhet të ketë patur nga kryeministri Rama.
“Nuk kam informacione konkrete, por një gjë është e sigurt, një shërbim informativ që harton raporte për përfshirjen e policisë, e krerëve të policisë në kultivimin dhe trafikimin e drogës sic ka bërë SHISH prej 2 vitesh është halë në sytë e narkotshtetit dhe të Edi Ramës, ndaj nuk mund të ketë konkluzion tjetër përveç presionit politik”, tha Basha në përfundim të mbledhjes së grupit parlamentar demokrat.
Më tej, ai këmbënguli në arrestimin me patjetër të ish-kreut të Rendit, Saimir Tahiri.
“Kërkesa jonë e pandryshuar që ka edhe mbështetjen e të gjithë botës perëndimore është që Rama të mos ushtrojë presion ndaj prokurorisë dhe mos përdorë imunitetin parlamentar për të mbrojtur Tahirin nga kërkesat e drejta të Prokurorisë. Tahiri duhet të arrestohet”, theksoi kreu demokrat. /tesheshi.com/
