Nga Blendi Gashi
Visar Ymeri, pas dorëheqjes nga të gjitha pozitat në Vetëvendosje, ka lënë pas shumë enigma për të ardhmen e tij politike, pra rrugën që do ndjek.
Ai, përveç që dha arsyet pse dorëhiqet dhe si duhet të ec tutje VV-ja, nuk tregoi nëse do vazhdojë të mbetet në parti apo do të largohet përfundimisht.
I pyetur nga gazetarët nëse do ta mbështesë kandidaturën e Albin Kurtit për kryetar të VV-së, në vend që të japë një përgjigje ai heshti.
Po ashtu nuk tregoi nëse do ta sfidon Kurtin për kryetar të VV-së, por vështirë që mund të ndodhë kjo pasi është i vetëdijshëm se është i humbur në garë duke parë mbështetjen që ka ish-paraardhësi i tij për t’u rikthyer në krye të partisë, çka u tregua edhe me mbledhjen e nënshkrimeve.
Në letrën e tij të gjatë që e lexoi në konferencë, Ymeri thumboi jo pak Albinin, për çka krejt fajin për përçarjet e fundit ja mveshi përkrahësve të tij, sinjal ky që vështirë se mund të rrugëtojnë bashkë në politikë.
Ymeri nuk tregoi nëse është takuar me Kurtin pasi ky i fundit doli nga paraburgimi dhe nëse dorëheqja vjen pas mosarritjes së një gjuhe të përbashkët me të.
Megjithatë, referuar paraqitjeve të Ymerit kur plasi skandali, se do pret që të lirohet Kurti për të biseduar për situatën, është një sinjal se “dyshja” kryesore e VV-së nuk janë pajtuar dhe kanë vendosur t’i ndajnë rrugët, edhe pse këtë nuk e tha në konferencë.
Sa do të dëmtohej VV…
Nëse veç largohen ngaVV-së, nuk përjashtohet mundësia që Ymeri dhe të pakënaqurit e tjerë, Dardan Molliqaj, Aida Dërguti, Shqipe Pantina, Dukagjin Gorani e ndonjë tjetër të formojnë një parti të re dhe ta dëmtojnë VV-në edhe brenda Kuvendit duke themeluar një grup të veçantë parlamentar (nëse bëhen gjashtë deputetë).
Ymeri në dorëheqjen e tij nuk e përmendi një gjë të tillë, por një pjesë e fjalimit të tij nënkupton se mund të ndodhë.
“Republika e Kosovës ka shumë nevojë për një subjekt politik që shëmbëllen integritetin, autonominë, ndershmërinë, demokracinë, sinqeritetin, vendosmërinë e qëndrueshmërinë që i duhet politikës”, tha Ymeri, duke shtuar se parime të tilla duhet t’i ndjekë VV-ja e jo të shndërrohet në zgjatim të një njeriu.
Por shtrohet pyetja: sa mund të formojnë një subjekt të qëndrueshën vetëvendosësit e pakënaqur veç nëse kanë në mendje të bëjnë këtë, kur koha ka treguar se partitë që po themelohen nuk po gjejnë përkrahje të madhe në elektorat, dhe dëshmia më e mirë është Alternativa e themeluar nga Mimoza Kusari-Lila dhe Ilir Deda?
Ymeri dhe të tjerët mund ta formojnë partinë e re që mund t’i shkaktojnë një dëm të vogël Vetëvendosjes së Kurtit dhe në kohë zgjedhjesh të lidhin ndonjë koalicion parazgjedhor me ndonjë subjekt më të madh për të marrë ca pushtet, por vështirë se mund të bëjnë një parti që do të qëndrojë në këmbët e veta pa u varur nga të tjerët.
Sigurisht se ky është një opsion, dhe vendimin final i mbetet ta marrin Ymeri dhe përkrahësit e tij, gjë që sigurisht se do bëhet i ditur për opinionin në fillim të muajit shkurt kur Vetëvendosje mban zgjedhjet e brendshme. Aty do shihet nëse vetëvendosësit e pakënaqur do maten me Kurtin apo do ndajnë përfundimisht rrugët. /tesheshi.com/
