Nga Blendi Gashi
Deputetja e AAK-së, Donika Kadaj-Bujupi, pas tre javë qëndrimi në burgun e Lipjanit është kthyer në shtëpi pasditen e së mërkurës ku do të qëndrojë në “arrest shtëpiak”.
Pas lirimit, Donika në shtëpi është vizituar nga kryetari i partisë Ramush Haradinaj, deputeti Pal Lekaj, gratë e Aleancës dhe miq të tjerë të afërm.
Kadaj-Bujupi në një bisedë për portalin tesheshi.com ka thënë se ajo është mirë me shëndet pas dy ditëve që ka pasur një gjendje të rënduar shëndetësore në burg.
Ajo ka treguar për kushtet dhe momentet që ka kaluar në burgun e Lipjanit.
“Kushtet në burg janë shumë të rënda. Është një ambient shumë i ftohtë sepse ka mungesë të vazhdueshme të nxemjes. Megjithatë duhet t’i falënderoi patjetër oficeret, personelin mjekësorë që kanë treguar një profesionalizëm”.
Donika, edhe pse e liruar nga burgu, thotë se nuk është ndjerë mirë sot kur është dalë nga aty pasi brenda ka lënë një kolege deputete.
“Nuk po ndihna mirë që prapa meje ka mbetur Albulena Haxhiu që është një e burgosur politike e cila nuk duhet të mbahet në burg”, ka thënë Kadaj-Bujupi për tesheshi.com.
Shefja e GP të AAK-së thotë nuk është penduar për hedhjen e gazit në Parlament dhe shton se sa herë që është e nevojshme do t’i përsëris veprat e njëjta për të cilat është arrestuar, vetëm për të mos e lejuar themelimin e Asociacionit të komunave me shumicë serbe dhe Demarkacionin e kufirit me Malin e Zi.
“Jam e gatshme se sa herë që kërkohet të ndërmarrë veprimet e njëjta që të ndalet e keqja q ëpo i kanoset vendit, që është Asocaconi të cilin qeveria po e themelon por që nuk mund ta kontrolloi asnjëherë.
Metodat tona nuk janë më të mira, por të domodoshme dhe jam e gatshme te veproj në interesat e vendit sa herë që është e nevojshme dhe të përsërisë të gjitha veprimet që do të ndalin Asociacionin me shumicë serbe dhe Demarkacionin me Malin e Zi”, ka deklaruar Kadaj-Bujupi.
Ajo thotë se nuk është në rregull që në Kosovë ka të burgosur politik, derisa shton se pavarësisht sfidave që po kalon, opozita është e bashkuar që të ndal dy marrëveshjet e dëmshme për vendin. /tesheshi.com/
