Donika Kadaj Bujupi, sot anëtare e kryesisë së Lëvizjes Vetëvendosje, ish-deputete e AAK-së, ka akuzuar partinë e Ramush Haradinajt se ka marrëveshje të fshehta me PDK-në.
Por më pas, AAK është kundërpërgjigjur se do të dalin përgjime edhe për Donikën.
“Derisa përditë po dalin skandale shumë të rënda për Hashim Thaçin, Isa Mustafa në vend që të distancohet, po jep deklarata që ‘Thaçi është president i shkëlqyer’. Kjo është shumë e dhimbshme kur kemi parasysh që votuesit e LDK-së e mbështetën Isa Mustafën dhe LDK-në, pikërisht duke qenë se iu premtua lufta kundër klanit ‘Pronto’. Sot mjerisht, LDK-ja nuk nxjerr asnjë zë për këto afera kriminale. Ky qëndrim i LDK-së është në kundërshtim edhe me vullnetin e anëtarësisë së këtij subjekti”, tha Kadaj Bujupi, e cila shtoi se edhe heshtja e AAK-së është tregues i qartë i marrëveshjeve të fshehta të kësaj partie me PDK-në, të cilat filluan që kur AAK filloi të heq vijat e kuqe për koalicion me këtë të dytën.
“Donike ti veç lutu mos te dalin pergjimet tuaja, kur ti i kerkojshe Aleances qe me cdo kusht te hyje ne koalicion me klanin “Pronto”!”, shkruan në rrjetet sociale, sekretari organizativ i AAK-së, Valon Tolaj.
/tesheshi.com/
