Ambasadori amerikan nuk i është ndarë Adriatik Llallës edhe pas largimit nga posti i Kryeprokurorit.
Donald Lu ka bërë sot një deklaratë bombastike ku thekson se ish-Kryeprokurori që i shpëtoi vettingut duket të ndiqet penalisht.
Dhe deklarata është bërë në rrugë zyrtare, duke mos folur vetë si person por në adresën e ambasadës së SHBA në Tiranë në një nga rrjetet sociale.
Jo më kot nuk është përdorur Facebook, por Twitter-i që është rrjeti më i përdorur në SHBA dhe më i preferuari nga Presidenti Trump.
Dhe pikërisht për të treguar theksin zyrtar, postimet janë bërë edhe në shqip, edhe në anglisht.
Sipas Lu, vendimi i Llallës për t’u tërhequr nga sistemi i drejtësisë është individual. Ndonëse thekson se Llalla i shpëton Vettingut me këtë tërheqje, ambasadori amerikan thekson se largimi nga sistemi i gjyqtarëve dhe prokurorëve nuk duhet të pengojë hetimin dhe ndjekjen e tyre penale.
“Vendimi për t’u tërhequr është një vendim personal, por largimi i çdo gjykatësi apo prokurori të korruptuar apo të paaftë është një fitore në betejën për një sistem drejtësie më të mirë.
Ata nuk mund të rikthehen në sistem për 15 vjet. Vendimi për t’u tërhequr nuk i shfajëson këta ish-zyrtarë nga përgjegjësitë e mundshme penale për korrupsion apo shpërdorim detyre.
Ata që kanë frikë nga Vetingu duhet të kenë frikë edhe nga hetimet e pashmangshme penale”, thuhet në mesazhin e Lu në Twitter. /tesheshi.com/
