Zyrtarët europianë që kanë vizituar dje një kamp refugjatësh në Gaziantep të Turqisë kanë shprehur përshtypjet e tyre më të mira për atë çfarë kanë parë.
Posaçërisht presidenti i Këshillit Europian, Donald Tusk, ka folur pa doreza, i pakursyer në lëvdatën për atë çfarë ka bërë e po bën Turqia për refugjatët.
“Sot Turqia është shembulli më i mirë për tërë botën se si duhet t’i trajtojmë refugjatët.”
Duke folur në një konferencë të përbashkët për shtyp me kryeministrin turk, Ahmet Davutogllu, e me kancelaren gjermane, Angela Merkel, Tusk ka shtuar gjithashtu:
“Askush nuk ka të drejtë t’i japë leksion Turqisë se çfarë duhet të bëjë!”
“Ky nuk është vetëm një vlerësim politik dhe formal…, është gjithashtu ndjesia ime vetjake.”
“Jam plotësisht i sigurt se do t’ia dalim. Nuk kemi rrugë tjetër!”
Fjala e kancelares gjermane në konferencën për shtyp pati të njëjtin ngjyrim. Merkel u shpreh se i kishte lënë mjaft mbresa puna e turqve në kampin e refugjatëve në Nizip.
“Ne pamë se sirianët ishin përqafuar si një shoqëri,” tha ajo.
Merkel e përshkroi si një hap shumë të guximshëm dhënien e lejeve të punës për refugjatët sirianë në Turqi.
“Objektivi ynë nuk është vetëm që të ndalojmë emigracionin ilegal, por që refugjatët të kenë më tepër mundësi pranë vendit të tyre,” ka deklaruar kancelarja.
Të rëndësishme do ta quante Merkel shikimin nga afër të asaj çka është bërë me refugjatët në Turqi.
“Turqia është vendi që ka pranuar numrin më të madh të refugjatëve. Dhe Bashkimi Europian duhet të marrë përgjegjësi.”
Donald Tusk çmoi ndër të tjera se marrëveshja mes BE-së dhe Turqisë po funksionon, “Kemi parë një reduktim të madh të valëve të emigracionit ilegal.”
Ai ka kujtuar se BE-ja do të shpenzojë një miliard euro këtë verë për projektet për përmirësimin e jetës së refugjatëve sirianë.
E akuzuar për shantazh ndaj BE-së, për keqtrajtim të refugjatëve, e për një marrëveshje në dëm të emigrantëve, Turqia ka marrë dje vlerësimet më të larta për trajtimin e refugjatëve nga kancelarja gjermane, nga presidenti i Këshillit Europian, e nga zëvendëspresidenti i Komisionit Europian. /tesheshi.com/
